Inhoudsopgave
Koumende week gaot geer hopelek allemaol naor ’t stumlokaal um eur stum aof te geve. Dat is e rech en door te stumme laot geer wete achter welke partij geer staot en wat geer winselek vint veur Mestreech en de Mestreechtenere de koumende veer jaor.
De versjèllende partijprogramma’s valle in de brevebös en daomèt hope de partije tot hun programma uuch aonsprik en daomèt eur stum kinne binnehole.
Woene in Mestreech en dus woeninge bouwe veur alle lui die gere hei wèlle woene is de koumende jaor erg belaankriek. Mestreech is ’n aontrekkeleke stad um te woene en touwkoms op te bouwe. Dat heet väöl te make mèt de stad wie de stad ziech prizzenteert en euverkump bij de lui die hei woene of wèlle woene.
Dat geveul heet te make mèt cultuur. De cultuur vaan Mestreech sprik hiel väöl lui aon en weurt door hiel väöl lui geappricieerd. Mestreech steit wat cultuur betröf neet stèl. Ummertouw is Mestreech in beweging en gebäöre dinger die de stad aontrekkelek make um hei te leve, te werke en te woene.
Dat is woersjijnelek daan ouch ’t gegeve tot hiel väöl partije in hun programma, neve ‘nen houp aander belaankrieke zakes, höbbe stoon tot ze ziech wèlle inzètte veur de cultuur en de taol vaan Mestreech. Dat klink sjoen meh wat hèlt dat in?
Neve ’n aontal profesioneel organisaties die ziech mèt cultuur bezeg hawwe zien hiel väöl inwoeners vaan eus stad mèt cultuur bezeg. Veer höbbe o.a. hermenieje en famfare boe hiel get lui wekeleks meziek make. Dat meziekmake kin op versjèllende niveaus en kin veur ’n aontal leie vaan meziekvereiniginge d’n opstap zien nao ’t conservatorium. Cultuur in optima forma.
Mestreech kin ouch vereiniginge die producties op de plaank wèlle bringe. Riggelmaoteg weurt gerippeteerd um ins in de twie jaor ’t publiek te laote kinnismake mèt producties, gemeinelek in de Mestreechter taol, die de meujte weerd zien. Ouch dat kleurt de cultuur en ’t leve in eus stad. Gelökkeg is Mestreech de koumende jaor bezeg mèt ’t bouwe vaan de Middezaol en ’t rinnovere vaan de Bonbonnière. De vereiniginge vaan Mestreech kriege daodoor in de touwkoms de meugelekheid um in fetsojndeleke accomodaties te laote zien en hure boe ze väöl energie in gestoke höbbe.
Boete de twie geneumde zakes gebäörd netuurlek väöl mie in eus Mestreech
‘t Mestreechter cultuurleve krijg trök wat ze jaore höbbe mote misse wie de Staarzaol en ’t Derde Orde gebouw d’r neet mie waore. Persoenelek vin iech die oontwikkeling hiel erg positief en daorum stèl iech miech herkeesbaar um die oontwikkelinge vaan kortbij mèt te make en te bewake tot ’t culturele leve vaan eus stad ouch de gelegenheid krijg um vaan nui meugelekhede en accomodaties gebruuk vaan te make.
