Inhoudsopgave
De SMV (Samewerkende Mestreechter Vastelaovendsvereineginge) is gruuts uuch te melle tot 'ne nuie veurzitter en penningmeister zien gekoze. Netuurlek daanke veer daobij ouch hun veurgengers Mat Brüll en Harry Fricker, veur wat zie de aofgeloupe jaore höbbe gedoon veur de SMV. Mèt twie dames goon veer 'ne nuie weeg in en op nao de Vastelaovend 2026.
V'r stèlle uuch gere veur aon Imgriet Habets es veurzitter en Bionda Eggen es penningmeister.
Imgriet
Imgriet zuut denao oet en vint 't 'n bezunder ier um häör groete leefde veur de Mestreechter vastelaovend te deile en in te zètte veur de Samewerkende Mestreechter Vastelaovendsvereineginge. 'n Gooj en fijn oonderling ambiance tösse de vereineginge vint zie hiel veurnaom. Zoe ouch 't vastelaovendsplezeer vaan de vereineginge es oonderdeil vaan de Mestreechter vastelaovend.
*t MVK -Mestreechs Vastelaovendsleedsjes Konkoer- vint zie 't ierste importante en, veural ouch, gezèllege evenemint vaan 't 5e sezoen.
De oetverkezing vaan 2026 weurt veur häör persoenelek 't 50e jaor. Wijer kinne vr melle tot zie vaanaof 't ierste oor lid is vaan Hermenieke Oet de Kuns 1974. Zie maak ouch meziek bij de Keuninkleke Symphonische Orkèsvereineging Laat en Zaat.
En zie is börgermètwerker in de financieel kemissie vaan de Tempeleers.
Sjariteit steit bij häör hoeg in 't veendel. Boe meugelek zèt zie ziech gere in veur carnevalsactiviteite veur joonk en aajd, kraank of gezoond
Bionda
Bionda is in't daogeleks leve zelfstandeg oondernummer. Zie heet e bedrief in financieel en fiscaol advies veur oondernummers. Ciefers en structuur zien veur häör eve vaanzelfsprekend es de vastelaovend in Mestreech.
't Mestreechs Vastelaovendsleedsjes Konkoer vint zie e sjoen stökske Mestreechter cultuur. De Mestreechter taol is dao ouch 'n belaankriek oonderdeil vaan, en dus zèt zie ziech in veur Veldeke Mestreech es penningmeister, zjus wie veur de Limbörgse Academie.
Ouch is zie es börgermètwerker bij de financieel kemissie vaan de Tempeleers werkzaom. Wijer is zie bij de VVE vaan boe zie woent actief betrokke.
Meziek en danse zien 'n passie vaan hãör. D'n aonvaank vaan 't vastelaovendssezoen mèt de verkezing vaan 't Mestreechs leedsje vint zie e prachteg momint. Zie loert oet nao 'n sjoen samewerking.
Laurens Bouvrie
Maurice Ubags
Van onze partner
