Inhoudsopgave
Dees week mós iech e pekske ophole. ’t Verbaasde miech tot dat op ’n aander adres waors es wat iech had opgegeve. Iech mós nao de Molensingel. Nao get zeuke voont iech ’t adres achter get twiede hands oto’s en ’n rij lui die veur ’t zelfde kaome.
Minsekinder wat ‘ne berg pekskes laoge dao um opgehaold te weure. Neet te geluive. Tot dee mins dee dat mós behandele dao nog oet wies kaom? “Petje af!”, dach iech bij m’n eige. Dat is oonbegonne werk.
Volges miech is dat begonne wie veer geplaog woorte door covid. Geine moch de deur oet um in de winkel get te goon koupe en dus woort besteld via allerhande websites en leet me ’t thoes bezörge. Daodoor koste bepaolde winkels in de stad hun deure slete want dao kaom geine mins mie. Noe löp ’t evels d’n aandere kant op.
Massaal bestèlle veer vaan alles en nog get via internet en stikke PostNL, DPG, DHL en alle die aandere in de pekskes. Ze wete op dit memint neet boe ze ’t zeuke mote. In de winkels die normaal de aofhooladresse zien höbbe gein plaots genóg um de pekskes te berge. Hopeloos gewoenweg.
De leveranceers sjikke de pekskes op tied weg en ’t gekke is, metein krijg me es klant de vraog via internet of ’t pekske good en correct is aofgelieverd want me wèlt, vaanweges de marketing, wete wat de klante vaan hunne service dinke. Tot de bezörger d’rin stik tèlt hoegswoersjijnelek neet mèt.
Sinterklaos, dink iech, zit in väöl gevalle te wachte of ’t bestelde kedooke wel op tied in de sjouw of in de sjoon zal belande.
Um dee pekskes stroom get tege te goon geit Den Haag noe de pekskes oet China extra belaste mèt zès euro. Iech hoort al iemes op d’n tèllevisie zègke tot dat neet zouw helpe. De Chineze zien zoe gooje koup in ’t producere tot dat altied ‘ne concurrent zal blieve. Dao is haos neet tegenop te bókse.
De winkels mote trökkoume en veer mote weer in de stad goon shoppe. Dat is ouch nog ‘ns gezèlleg. Zoe zuut me mer weer tot alles ouch zien minder plezerege kante heet.
Vreuger kós me ziech nog ‘ns vergape aon de kiekoete die vol laoge veur Sinterklaos en Keersemes. Dao ging me veur de stad in.
Iech hoop veur uuch tot alles op tied gearriveerd is en tot ’t bijbehurende veerske neet indigde es volg:
Sinterklaos had get veur diech bedach
heet dao lang, hiel lang op gewach
waors op tied mèt ’t te bestèlle via internet
meh, verdikkeme, ’t is d’r neet en godwèt
ligk ’t urges in e maggezijn te wachte
bij ‘ne bezörger mèt slaopeloeze nachte
dee hèl wèrk en neet ligk te lummele
en gelökkeg, veur diech,
kint ’t kedooke neet goon sjummele.
Jan Janssen
