Inhoudsopgave
Höb geer ’t ouch gemerk? De lèsten tied lees me dèkser tot vereiniginge toneel beginne te speule. Buurttoneel. Lui pakke ziech same en bedinke e verhaol, gemeinelek herkinbaar veur lui oet de naoventrint, en bringe dat op de plaanke. Dinger die in de directe umgeving gebäöre, lekker kortbij en herkinbaar, höbbe ouch dèkser ‘ne houp humor in ziech. De betrekkelekheid vaan dinger weure soms ziechbaar. Daodoor sjaggerneert me ziech minder aon dinger en nump me dinger mèt e körrelke zaajt.
Aon d’n tèllevisie is geine mieter mie aon, ummertouw dezelfde programma’s, veural praotprogramma’s. D’n eine deskundege rolt euver d’n aandere en oondertösse kinne veer de verhaole wel. Taghi vint geine avvekaot, Poetin is veur geine meter te vertrouwe, euveral haange drones in de loch en Trump liet ziech veur ’t lepke hawwe en meint tot heer de bèste is. Sjei toch oet!
De lui höbbe zin um nao aander dinger te loere en te luustere. Wie sjiek is ’t daan es ’n aontal lui ziech bijein rape um aandere te ammesere mèt e leuk toneelstök. De verhaole zien dèks herkinbaar en oet ’t leve gegrepe en dao höbbe de kiekers zelf e verhaol bij en ze herkinne de figure die gespäöld weure. Hilarisch kint dat zien.
Veur de kiekers is dit ’n veraodeming. Me moot ’t hoes oet um de veurstelling te zien en dat op ziech is al ‘ns get aanders es aanders. ’t Hoes oet en achter d’n tèllevisie oet. Me tröf zien naobers die ouch koume loere en nao de veurstelling eve blieve haange um ziech same eint te drinke en bij te klasjenere. Welliech weure, door ziech oonderein bij ’t toneelstök te treffe, weer aander aofspraoke gemaak en koume daodoor aander activiteite weer opgaank. Veer mote dèks opnui liere tot boete d’n tèllevisie d’r ouch aander dinger bestoon um ziech oonderein te ammesere.
Riggelmaoteg gaon iech verhaol vertèlle aon gróppe lui en dat is e sjiek gebäöre. Lui luustere gere nao die verhaole. Eve mooste diech zelf ’n veurstelling bij ’t verhaol make. Dat is bezunder want dat zien veer dèks neet mie geweend. Eve kump d’n tied vaan vreuger op sjaol weer trök es de meister of de juffrouw verhaole veurlaos. In mien geval waore dat de verhaole vaan Winnetou en Old Shatterhand, ‘nen Indiaan en ‘ne cowboy die ziech oonderein good kóste verstoon en same dinger oplosde.
Binnekort weure de keersverhaol weer oet de laoj gehaold en koume de lui in Kapel Opveld luustere nao die verhaole. Bij ‘ne sjoene keersboum en aongepas leech koume de verhaole tot leve.
Mestreech heet ’n aontal gezelsjappe die mèt riggelmaot get op plaanke bringe um de lui te ammesere. Gaot dao nao touw en geer zalt merke tot veur uuch ’n gansen aandere wereld ope geit. Kemedie make is ‘ne prachtegen hobby, veur de speulers en veur ‘t publiek.
Jan Janssen
