Inhoudsopgave
Koumende maond viere veer tot op maondag 20 oktober 175 jaor pepier gemaak weurt in Mestreech. Dat is ‘ne langen tied boe in pepier iers vaan lomele en later vaan cellulose woort en weurt gemaak.
Sappi is noe ein vaan de lèste groete industrië in eus stad. Sphinx is neet mie, Enci is neet mie en de Bates Cepro / Mondi is ouch al verdwene. ’t Spijker- en draadnagel febrik vaan Thomas Regout boe noe hoofzakelek aander dinger gemaak weure is same mèt Sappi euvergebleve. Eus stad is langsem veranderd vaan industriestad nao kinnisstad. Vreuger zouw me gezag höbbe tot de overals oet ’t stadbeeld verdwene en tot de hummes mèt krevatte daoveur in de plaots zien gekoume. Meh dat geldt ouch neet mie.
In 1950 woort gevierd tot het Koninklijke Nederlandse Papier Fabriek persijs ’n iew bestoont. Dat woort destijds gevierd op zaoterdag 21 oktober 1950 mèt um 11 oor in mès oet daankbaarheid in de Sintervaos. Daonao woort op de Vriethof ’n foto gemaak mèt alle lui die bij de KNP wèrkde, 622 personeelslede.
Dat zjubilei waors reie um al in 1949 e mannekoer vaan wèrknummers vaan KNP op te riechte. ‘t Maasvogels zaankkoer waors zoe e feit. Directeur Leon Lhoest waors zier geleef bij zien lui en wis dat veurein te kriege. In 1957 trooj ’t koer veur ’t iers nao boete mèt e publiekelek optreie.
’t Doorde tot ’t jaor 1966 ie de groeten doorbraak kaom. In dat jaor woort de kemikken opera “Trijn de Begijn” opgeveurd. Trijn woort destijds gespeuld door Mariëtte Janssens. ’t Waors e groet sukses en d’r woort zelfs ’n plaat vaan gemaak.
’t Koer vaan de Maasvogels verzörgde alle koerwèrke en de Avanti kapèl zaot in d’n orkèsbak.
Gezeen ’t groete sukses vaan de Trijn woort twie jaor later, in 1968, de kemikken opera “De Kaptein vaan Köpenick” op ’t toneel gezat. Gans Mestreech leep oet um de veurstellinge bij te woene. Mao Willems zat veur d’n ierste kier de kapitein deneer. Mao waor de kapitein en zouw dat ummertouw vol euvergaof blieve speule. Hiel get Mestreechtenere rappelere ziech de hoes vaan de langspeulplaat boe Mao gans gruuts veur ’t stadhoes opsteit. De Vroom maakde die oetgaof meugelek.
Later, in 1973, woorte oetveuringe gegeve vaan “de Ceasar” euver ’t leve vaan kiezer Julius Ceasar.
Oonder de naom de Maasvogels woorte in 1975 “de Kiezer op Sint Pieter” opgeveurd, “Trijn de Begijn” volgde in 1977, in 1978 woort dao “Mie Fien Mamzèlke” aon touw gevoog en in 1980 woort “Frau Luna” in de Bonbonnière op de plaanke gezat.
Gezeen de sociale oonrös en ‘t dreigend oontslaag vaan 340 lui, wat r’s oetindelek 200 woorte, mós de operette vereineging de Maasvogels aofsjeid numme vaan de KNP.
De KNP had tot deen tied ummer garant gestande veur de oetveuringe. Dat kós evels neet mie. De Mestreechter Operette Vereineging waors es gevolg daovaan e feit.
Jan Janssen
