Inhoudsopgave
De drei veurstellinge vaan “Revue aon de Maos” zien weer achter de rögk. Dit jaor waors de veerde kier tot de revue woort geprizzenteerd en vol zaole trok. Op nao ’t ierste zjubbelei, 5 jaor revue.
De kaartverkoup is in eder geval begonne en wie! Binne e paar tèlle waore de ierste twie veurstèllinge veur 2027 al zoe good es oetverkoch. Dat gief de börger, en veural de sjrijvers, mood um weer get gekke dinger op pepier te zètte. Dus alle sjele wawwel is mie daan welkom en de compoeter wach vol oongeduld op de ierste aonsleeg op ’t toetsebord.
De mieste sketches weure vaan de zomer gesjreve. Dat is nog wied veur de vastelaovend meh daan heet me ouch de rös um euver get zakes nao te dinke. Mie kentoer is daan in de väörtent vaan euze caravan op Randwyck te vinde. Mèt e fris gleeske wien en e stökske Franse kies is ’t heerlek um te prakkezere euver de nui oonderwerpe.
Aandere zien daan al bezeg um de nudege leedsjes te zummere die passe in de revue. Hiel get melodiekes koume oet ’t rieke rippertoire vaan de vastelaovend oet Kölle. Dao weure sjoen leedsjes gemaak boe veer ‘ne sjoene en rieke Mestreechter teks op kinne make.
Väöl reacties kriege veer dao op. De lui hure die leedsjes daan eine kier in de revue en daonao noets mie. Ouch dao wèlle veer get aon goon doen en dao heet euze veurzitter, Jean Boelen, e sjiek en sjoen idee euver. Geer gaot dao in de loup vaan ’t jaor mie euver hure. ’t Bestuur vaan de revue zit neet stèl!
De sjoenste dinger zien de daogelekse dinger. ’t Verkierd boke vaan ’n vekansie en daan oonverwach oetkoume op ’t nudistecamping is toch e gegeve dat aonleiing gief um dao e verhaol vaan te make. Drei kier 900 maan in de zaol zaoge dat gebäöre en ammezeerde ziech köstelek mèt ’t kóppel dat dit waors euverkoume. Es geer touwvalleg zoe e soort verhaol kint daan maag geer us dat influustere. Veer vertèlle neet vaan wee veer ’t te wete zien gekoume.
De Duitse dansgróppe zien ouch ’n verrieking vaan ’t programma. ’t Bouwe vaan minseleke pyramides bliek veur die meidekes kinderwerk te zien. In e raozend tempo zètte zie ’t prachtege show inein en laote de lui in de zaol mèt ope moond genete vaan e betere goej en smiet wèrk.
’t Prakkezere is alweer begonne um de zjubbelei revue inein te fisternölle. Mestreech en de Mestreechtenere geve genóg aonleiing um nog jaore de revue te völle mèt flawweköl en sjele wawwel.
Wat is vastelaovend toch e heerlek fies. Wee zouw noe in godsnaom in Hoenderlo wèlle woene?
Jan Janssen
