Inhoudsopgave
Weke laank woorte veer verpliech nao allerhande snoetswerke te loere die langs de weeg stoonte en diech, es aspirant stumme gever, aon loerde in d’n hoop tot’ste dien stum aon eine vaan hun zouws geve. Iech zelf hong achter de roete bij versjeiene lui in de stad. ’t Blijf evels e raar geveul oprope um reklaam veur d’n eige te make en daoveur dien eige geziech euveral te zien haange. Gelökkeg is dat noe weer veurbij en höb iech mèt de lèste posters de pepierbak mage völle.
’t Is ‘ne rare tied es de verkezinge d’r aon stoon te koume. Me loert trök op de veer veurgaonde jaore en me perbeert ziech veur de geis te hole wat allemaol in die veer jaor gebäörd is. Wat höbbe veer es clubke veur Mestreech kinne doen? Wat höbbe veer bereik? Is Mestreech dao beter vaan gewoorde?
Veer jaor is ‘nen langen tied. Gaot zelf mer ‘ns nao wat in eur eige umgeving in de aofgeloupe veer jaor allemaol gebäörd is en wat daodoor in eur memorie is blieve haange. Geer zalt eur hersepan behuurlek mote laote wèrke um dat veurein te kriege. Urges is dat ouch mer good. De wereld drejt jummers door, niks steit stèl en ederen daag beleve veer dinger, groet of klein, die de meujte weerd zien. D’r zalle altied dinger zien boe’ste diech op kins spitse en die de meujte weerd zien um te beleve.
Vendaog, vriedag 20 miert 2026, is ‘ne spannenden daag. Venmiddag weurt bekind wee wieväöl stumme heet wete te verzamele en daodoor in de gemeinteraod maag zitte de koumende veer jaor. Veur ’n aontal lui zal dat ouch beteikene tot ze nog eve op ’t reservebenkske zalle mote plaotsnumme. De touwkomstege wèthawwers zien op dit memint nog gewoen gemeinteraodslid en sjuive pas door nao hunne pós es ze beneump weure en es de coalitie gevörmp kint weure. Pas daan koume hun plaotse vrij en kinne aandere doorsjuive en gemeinteraodslid weure. ’t Blijf dus nog eve spannend veur get lui die noe op de reservebaank mote plaotsnumme.
Op dit memint steit de wereld op z’ne kop door d’n oorlog in Oekraïne en d’n oorlog in Iran. Geinen dörf ’n veurspelling te doen wie dat geit aofloupe en wat dat veur de wereld kin en geit beteikene. De gaaspries en de bezienpries sjete de loch in en dat zal euveral in trök te vinde zien. Alles zal deurder weure en dat zal ederein in ziene of häöre portmonnee veule. Veer zalle es gemeinteraod mote blieve oplètte tot lui in eus gemeinte neet oet de boot goon valle.
D’r drök ’n groete verantwoordelekheid op eder vaan die 39 gemeinteraodsleie de koumende veer jaor en laote veer us dao good vaan bewus zien, want daan kump ’t good mèt Mestreech en de Mestreechtenere.
