Inhoudsopgave
E jaor is sjoen ingedeild in tiedvakke. Eder tiedvak heet zien bezunder fieste en tradities. Zoondag begint d’n advent, d’n tied veur Keersemes. Veer bougies stoon veur de veer zoondage/weke veur tot ’t Keersemes is en veer de geboorte viere vaan Slivvenier. Zoondag maag d’n ierste bougie goon branne. In de katholieke kèrk bereie veer us zoe veur op ’t fies vaan de geboorte vaan Slivvenier.
Keersemes is e vruntelek fies. Es e kinneke gebore weurt is dat zeker ’n reie um fies te viere. Weer ‘ne nuie börger de bij. Daorum is Keersemes ouch ’t oetgesproke fies um mèt de femilie bijein te koume. Neve verhaole vertèlle of nao verhaole te luustere is dat ouch d’n tied um same te ete en te drinke. Me wèlt ’t gewoen gezèlleg höbbe. Same roond ’t kribbeke en de keersboum. Alle bougiekes weurde aongestoke en geve ‘ne bezundere sfeer.
Iech dink tot Keersemes d’n tied is dee hiel väöl inspiratie gief um verhaole te bedinke en aander lui daomèt te ammezere. In mien bokekas stoon hiel get beuk mèt verhaole die betrekking höbbe op Keersemes. De mieste zien zeutsappeg en dus neet gesjik um die aon Mestreechtenere te vertèlle. Jaore geleie zien Rob Meurders en iech begonne um zelf keersverhaole te bedinke en te vertèlle aon de lui die op de wandelinge mèt us mètginge.
Keersemes, of in eder geval d’n tied vaan veurbereiing, ís ‘ne tied boe ’n houp dinger gebäöre die de meujte weerd zien um euver te sjrieve. Dao gebäört altied vaan alles. Vreigel euver de gruutde vaan de boum, allegatie euver de kleur vaan de keersballe dit jaor, kleiercrisis euver de fieskleier mèt de Keersemes en gaank zoe mer door.
Ein vaan de sjoenste en ammesantste verhaole die iech vertèlle maag is ’t verhaol euver de vreigel tösse maan en vrouw euver ‘nen echte keersboum en ‘ne kunsboum. Zij wèlt ’n kunsboum vaanweges de zwijderij eder jaor en heer wèlt ‘nen echte boum vaanwege d’n heerleke reuk deed aan in hoes hingk.
’n Aander verhaol, e verhaol vaan Rob, geit euver e moslim jungske dat maag mètdoen op sjaol aon ’t keersspeul en thoes moot oetlègke wat dat persijs veurstèlt. Gelökkeg doen in ’t speul ouch sjäöp mèt en maag dat jungske die rol vervölle en deit heer toch mèt en weurt neet boetegeslote.
Es geer de koumende weke ’n bougie vaan d’n adventskrans aonstèk zal iech zörge tot geer dao e sjoen verhaol bij vint. Same kinne veer us zoe veurbereie op ’t Keersfies vaan dit jaor.
Jan Janssen
