Inhoudsopgave
Vastelaovend is ‘nen aonslaag! Laot dat gezag zien! Me löp mie es aanders, it aanders es aanders, drink mie es gewoenelek en geit later nao bèd es aanders. Um trök in ’t gewoen ritme te koume vraog dus hiel get disciplien vaan iemes wie miech.
Asselegoonsdag höb iech, um te beginne, mer neet ‘ns in d’n agenda geloerd en ’t devaan genome. Donderdag kaom mien broor op feziet mèt ’n riestevlaoj mèt slagroum en sjoklaat. Kiek daan weurt me weer e bitteke mins. Vaan zoeget knap me redelekerwijs op en begint me ziech weer mins te veule. Noe is mer te hope tot mienen hoesdokter neet mèt lees! Gelökkeg had mie broor e middelmäötsje gepak en gein groete vlaoj, dat is weer positief te neume.
Oondertösse zien veur ‘Revue aon de Maos’ veer aovende in de verkoup en löp de verkoup bezunder positief. Mestreechtenere wèlle massaol weer koume genete vaan kwatsj en oonzin bij de koumende vastelaovend. Dat lègk netuurlek drök bij de sjrijvers vaan de revue. Wat mote veer noe weer bijein prakkezere um de lui ‘nen aovend plezeer te bezörge? De nuien titel is “Oelala” en dao kinne veer hiel get kante mèt op. ’t Ruuk nao Fraankriek en heet ouch get ‘stouts’ in ziech.
De Franse höbbe dat ‘stouts’ in de gene zitte en dat sprik miech wel aon. Leedsjes wie ‘je t’aime mois non plus’ bewieze tot Franse aanders nao ’t leve en de leefde kieke es eine vaan us, nuchtere Mestreechtenere. Dat belaof dus get veur de koumende revue. De pekskes en de klèttekes vaan de speulers zalle dus ouch get pikanter weure es de kostuums vaan dit jaor. Manslui die veurraon in de zaol zitte höbbe dus woersjijnelek de betere plaotse es eus planne vaan dit memint in eder geval doorgoon es wie ze noe zien. Iech gun ’t die jonges.
Es iech eve trök dink aon d’n aofgeloupe vastelaovend mote veer ouch eve stèl stoon bij de jäögprins Luciano en prinses Faith-Lynn. Alletwie 9 jaor aajd. Ze höbbe toch mer sjoen wete pin te hawwe en zien tot ’t lèste debij gebleve. ’t Prinske waors zelfs dinsdagaovend um twelf oor nog bij de pinke en wouw dat memint, ’t aoflaote vaan ’t Mooswief, mèt make. Ze waore ouch de ganse aovend bij de revue gebleve en iech kraog nog e sjoen komplemint vaan prins Luciano wie ze vroge wat heer leuk had gevoonde aon de revue. Zien antwoord waor: deen awwe maan! Dat hölp miech d’n draod weer op te pakke en mèt d’n twie veuj op de groond te koume. Heerlek oprech antwoord.
Dat waor de vastelaovend 2026 en noe op nao de koumende vastelaovend euver gein 52 mer 51 weke.
