Inhoudsopgave
Dees week höb iech dekser ganse discussies mote aonhure die ginge euver de nuiste oontwikkelinge vaan AI (Artificial Intelligence — in het Nederlands: kunstmatige intelligentie). Zeker es ’t euver de versjrikkinge vaan d’n twiede wereldoorlog ginge die door middel vaan AI woorte aofgeloge. Zelfs de gelierde höbbe groete probleme mèt dat gebäöre. Mèt behölp vaan AI kint me de historie umbuige en lui laote geluive tot ‘t allemaol aanders is gewees, minder erg en mèt aander bedoelinge.
Zoe oontstoon nui groeperinge in eus maotsjappij die hunnen eige teks en oetlègk geve aon dinger die in ’t verleie gebäörd zien. Ze verdrejje de historie umtot zij de versjrikkeleke woerheid, ’t oetroeie vaan miljoene lui, neet oonder ouge wèlle zien. Tot aander lui, slachoffers en femilie, dao väöl verdreet en pijn vaan höbbe vinde die lui neet rillevant.
Veer kinne AI evels neet mie wegkriege. Iech maak miech zörg euver de touwkoms es veer astrein neet good wete um te goon mèt dinger die ech neet woer zien, verdrejd zien of gewoen geloge zien. D’r zalle altied lui zien die dao neet doorheen kieke en goon geluive wat door verkierde lui in de wereld weurt gezat.
AI is d’r einmaol en lui gebruken ’t ouch op gooj menere. Lesteg te leze stökker kint me door chatgpt laote leze en daan kint me vraoge aon chatgpt wat persijs de bedoeling is vaan datginnige wat gesjreve is. Ouch kint me daan vraoge: “Wat moot iech hei noe mèt?” Chatgpt gief daan in klaore taol ’n antwoord op dien vraoge boedoor zakes dudeleker weure.
Chatgpt kint ouch veur uuch ‘ne breef inein tummere. Zeker es geer zelf neet sterk zeet in de Nederlandse taol en probleme höbt mèt ‘d’ en ‘t’ en of e woord noe werkelek Nederlands is of verbasterd dialect. Daan kint chatgpt uuch oet de brand helpe en ‘ne sjoene breef veur uuch opstèlle. Veer kinne us door chatgpt zelf veur ’t lepke laote hawwe.
Zoondag is ‘Moederdag’ en geer, es maan, komp d’rachter tot eur keend gei veerske heet veur mamma en tot dat astrein e groet gemis zal zien en geer welliech vaan eur vrouw ’t verwiet krijg tot geer dao nog neet ‘ns aon gedach höbt. Daan is chatgpt eure groetste vrund want geer hoof mer te vraoge veur e ‘moederdag’ gediech en heer maak ‘t. Geer moot wel nog eve aongeve wat zoe bezunder aon eur vrouw is beveurbeeld: ze is ummer good gekleid, ze dreug gere glinsterende oerbelle en ze kin hiel lekker ete koke.
Nou daan zeet chatgpt:
Leef mamma, altied sjiek en sjoen
Mèt glinst’rende oerbèlkes, de verdeens vendaog ‘ne poen. Diech bis ‘n mamma um e leedsje veur te zinge en ’ne groete stroek blomme nao te bringe
Oet dien keuken kump ummertouw ‘t lekkerste vleis,
Veer vraogen us aof wie’ste dat ederen daag deis .
Vandaog zètte veer diech good in ’t zönneke,
Fijne Moojerdaag, mamma, hei is diene kedo (en ouch ’t bönneke)
