Inhoudsopgave
Goonsdagaovend höb iech ’n lezing gehawwe euver euze Mestreechter vastelaovend in de Cellebroederskapèl. Op de ierste rij, gans veuraon, zaot de prins vaan de Sjraveleirkes oet Hier, prins Twan d’n Ierste. Twan is 9 jaor joonk en wouw al 5 jaor prins weure. Heer waors mèt ziene pap gekoume um ‘ns get mie vaan vastelaovend aon de weet te koume. Dat is toch hiel bezunder tot zoe’ne gamin ziech al interesseert veur de vastelaovend en alles wat daomèt te make heet.
Heer heet deen aovend aondachteg zitte te luustere al zal ’t nudege neet bij häöm geland zien umtot heer nog väöl te joonk is, meh de ierste zäötsjes zien gezejd.
d’n Daag daonao, op donderdag dus, zien veer es Tempeleers op bezeuk gegaange bij basissjaol Sjaan. Doezendhoonderd kinder stoonte de prins en zien gevolg op te wachte en lete mètein hure tot ze ’t liefleed vaan d’n Hoegen Hoeglöstegheid al good oonder de knee hadde. De jäög heet de touwkoms en es ’t oonderwiezend personeel de kinder ’t leedsje liert daan maag iech ouch hei weer constatere tot de ierste zäödsjes veur de vastelaovend in Mestreech al weer gezejd zien.
’t Is e genot um te zien wie ederein ziech aon ’t veurbereie is op de vastelaovend. Later op de middag brach de prins e bezeuk aon de Croonenhof in Hier. De stumming oonder de luikes die dao woene waors gewoen perfek. De geziechte vaan al die luikes bij de Croonenhof stoonte op geziech nómmer 11. Mèt e gleeske beer of get limmenaad woort geluusterd nao de prinseleke wäörd vaan stadsprins Lloyd d’n Ierste, ‘ne jong dee zelf twie straote weier woent in Hier.
Vasstelaovend is en blijf toch e bezunder fies dat hiel väöl lui raak. Vaan keends aof aon heet me dit fies liere viere en hiel väöl lui in eus stad wèlle dat ouch viere en ziech drei daog verlere in dit volksfies bij oetstèk. ’t Fies heet wel de nudege veranderinge mètgemaak. Allewijl zuut me in Mestreech nurges mie maskes. Niemes verbörg zie geziech nog achter e maske meh daorintege zuut de mies fantastische, geschminkte creaties. De cowboys en indiane tröf me ouch neet mie aon meh dao tegeneuver zuut me geweldege creaties die door ‘ne creatieve geis ineingefisternöld zien gewoorde. Door d’n opkoms vaan ledleech zien de meugelekehede ouch haos oonbeperk gewoorde.
Dus laot eure geis de vrije loup en maak get wat nog geine oets gemaak heet. Ouch dat is vastelaovend en de maker vaan die creatie zal ziech beslis op zien of häör gemaak veule en drei daog plezeer höbbe um ’t pekske daonao weer, inclusief herinneringe, in de vastelaovendskis op te berge.
Jan Janssen
