Karel de Vijfde obbenuits

Verleie zoondag wie ’t zoe regende höbbe veer op de Merret opnui de Blijde Incomste vaan Karel de Vijfde gespäöld. Dat is toch merkwierdeg tot dat speul ummertouw weurt gebruuk es get in Mestreech te doen is. In 1905 heet euzen Olterdissen dat veur d’n ierste kier gedoon. Heer wouw Mestreech laote zien wie fiestelek de stad kós zien es bezunder lui nao Mestreech kaome. Karel de Vijfde is twie kier officieel in eus stad gewees en de lèste kier waors eigelek d’n indrökwekkenste kier. Heer kaom zien zoon, opvolger veur d’n troen, veurstèlle aon ’t volk. Ziene zoon, Philips d’n Twiede.

Wie die twie nao Mestreech kaome woorte ze op ’n speciaol wijs oontvaange. De Mestreechtenere hadde naomelek ’n reus gebouwd dee behuurlek angsaonjaogend oet z’n ouge loerde. Dat doog de gaste al behuurlek sjrikke en daobij had de reus ’n zak aon ziene reem haange mèt twie figure dao-in, twie poppe. Ein pop stèlde de vertegenwoordiger vaan de Prins-Bissjop vaan Luik veur en de aander pop d’n aofgezand vaan d’n Hertog vaan Braobant. De Mestreechtenere lete heimèt wete: ze kinne wel dinke tot ze de mach höbbe, geer ouch Karel en Philip, meh veer Mestreechtenere doen toch wat veer dinke tot good veur us en eus stad is.

Dat is ’n dudeleke kemissie gewees aon dee Spaonse heerser die noe nao al die jaore nog ummer indrök maak en teikenend is veur wie Mestreechtenere dinke en doen.

Wie euze keuning Willem Alexander zien verloofde, Maxima, kaom veurstèlle aon ’t volk vaan eus gooj stad woort dit speul ouch weer opnui opgeveurd. Bij ’t Spaons Gouvernemint stoonte Pieke Dassen en Philip Dumoulin es Karel de Vijfde en Philips d’n Twiede klaor um in ’t kort e stökske vaan de historie vaan Mestreech te laote zien en hure. Of ’t verloof stèl dao get vaan heet mètgekrege is mer gans de vraog want es me verleef is heet me oug veur ganse aander dinger.

Noe, bij de Historisch Evenemint Mestreech, woort opnui de Blijde Incomste nao gespäöld. De Prins-Bissjop waors dao en ouch Karel de Vijfde, Philips d’n Twiede en de gemalin vaan Karel, Isabella van Portugal. Zelfs Sintervaos waors aonwezeg op de Merret. In Mestreech kint alles, haos alles. Dao woort gedans roond de vrijheidsboum mèt linter. D’r waor e riddergevech woebij gevochte woort um de hand vaan de “schone jonkvrouwe” en d’r waors ’ne kaorddanser oet Amerika dee op ’n spectaculair wijs zien kunste vertuinde en ’t volk leet mèthelpe. 

Of ’t bij de echte Blijde Incomst toendertied ouch zoe is touwgegaange is mer gans de vraog. Tot me neet vies waors vaan e fieske dat is zeker. Es get te viere vèlt daan steit de Mestreechteneer veuraon. Dus Karel en Philip zalle dat beslis gemerk höbbe.