Keersgedachte

Dees week zaote veer bijein mèt ’n aontal lui die betrokke zien bij de Nach vaan ’t Hart. Veer hadden ’t euver de koumende editie vaan de Nach die op 27 dezember geit plaotsvinde. Op mierdere plaotse weure op dee aovend keersverhaole vertèlt aon de lui die mèttrekke. Dat hèlt in tot eine vaan us weer ‘ns in de pen maag kroepe um e nui keersverhaol te sjrieve.

’t Keersverhaol aon ziech is bekind meh roond de Keersemes gebäöre hiel väöl dinger die de meujte weerd zien um dao e verhaol euver te make. Pak beveurbeeld de strik vaan Pierre Rieu. ’t Is nog lang geine keersemes meh de sfeer zit d’r noe al in. Lees de gezèt mer ‘ns d’rop nao.

Keersemes is ’t fies vaan ’t leech. Slivvenier, zoe hèlt de kèrk us veur, brach leech in dizzen duustere wereld. Leech maak tot’ste ’nen heldere kiek höbs op alledaogse dinger en daodoor, zoe liert us ’t gelouf, ouch kees veur de gooj, oprechte dinger in ’t leve. Dat maak ’t leve, ’t leve weerd en tot veer us oonderein good kinne verstoon en verdraagzaam zien. 

Ederein beleef dit evels e bitteke aanders. Dao zien genóg lui die noe al thoes beginne te bouwe aon dee keerssfeer. Ganse dörpe weure gebouwd boe rendiere door de loch vlege en treins roond rije. ’t Groet leech weurt neet mie aongedoon in hoes meh doezende klein lempkes straole, zoe gaw es ’t boete duuster weurt, in hoes. De lui zeuke massaol nao sfeer en gezèlleg leech. Keersemesverseering is en veult e bitteke kitscherig aon, este ’t miech vreugs.

Iech weet neet beter es tot mèt de keersemes twie kleure de bovetoen veure, naomelek roed en greun. Este daan ’n groete roej strik ophings en dao doezende lempkes bij lies straole daan is dat toch d’n optimaolste keerssfeer dee me ziech kint bedinke. 

Dit gebäöre zouw dus zoe mer e begin vaan e sjoen keersverhaol kinne zien. Stel diech veur: ’n kóppel is op zeuk nao ’n oonderkoume. Vaanwege Magisch Mestreech zitte alle hotels vol. Euveral kriege ze hure tot gein plaots mie is. Oetindelek koume ze bij Derlon aon en dao is ’n de kelder bij de Romeinse opgraovinge nog e pläötske um op ’n aw matras, want ze höbbe jummers gerenoveerd, te goon slaope. Snachs weurt hun kinneke gebore. Alle oondernummers oet Mestreech höbbe ’n versjijning gehad en hoorte tot ze ’t kinneke móste zeuke in ’t hotèl mèt de strik en ‘t staareleech. En ze kaome mèt allemaol Mestreechter kedookes.

Zoe e verhaol zouw toch zoe gesjreve mote zien of neettaan? Zoe zeet geer mer weer: ’t college en de raod vaan eus gooj stad zörg zelf veur ’t oonderwerp.