Inhoudsopgave
Ederen tied vaan ’t jaor heet zien kleure. Veer leve op dit memint in d’n tied vaan vastelaovend en dao hure de kleure roed-geel-greun bij. Wie zien veer aon de kleure gekoume? Höb geer uuch dat wel ‘ns aofgevraog?
Roed: is de kleur die me touwsjrijf aon leefde en wermte. Dao had me in de versjrikkeleken wintertied extra behoofte aon. De bieste had me binne gehaold en die stoonte dus kort bij de lui. De stal waors dèks aon ’t hoes gebouwd, dus me had indirek contak mèt ’t vie. ’t Vie dat ouch deveur zörgde tot me op de gooj meminte get euver d’n tand kraog. Daorum mós me good veur hun zörge.
De femilie leefde in de wintermaonde ouch kort bijein. Boete waors ’t kaajd en vroor ’t dèks, dus thoes woort gestook en waors ’t good. Dao woort in deen tied väöl aon hoesnijverheid gedoon. Meidskes leefde ziech oet in borduurwèrk en nejwèrk. De jonges waore dèks bezeg mèt houtbewèrke en dat soort zakes.
Geel: geel steit eigelek veur goud. In de heraldiek weure twie kleure (roed en greun) gesjeie door ’n edelmetaol. Geel is trouwens ’n liechte kleur en verwijs nao ’t leech. De daog woorte langer en de zon leet ziech weer get dèkser zien en dat gief lui e good gemood. Me heet daan ouch weer zin um lol en plezeer te make, dus vastelaovend.
Greun: de winter voonte de lui vreuger ‘ne versjrikkeleken tied. ’t Waor vreug duuster, kaajd en naat. De natuur waors doed op e paar plante nao zoewie huls, klimop en dennebuim. In d’n hoop tot alles oets weer good ging koume gebruukde de lui die plante want in die plante zaot volgens hun nog get vaan leve. Greun waors en is nog ummer de kleur vaan leve, passie en fiesviere want ’t leve geit weier. Daog weure weer langer en nui vie (lemkes in de wei) woort gebore.
Noe laos iech tot de kemissie die euver de welstand geit in Mestreech meujte heet mèt de kleure vaan ’t hotèl vaan Pierre Rieu. En dao bin iech nogal verpopzak euver want keersemes heet toch al jaore de kleure roed en greun. Eigelek kint me dao groetendeils de zelfde verklaoring veur geve es veur de kleure vaan de vastelaovend. Greun steit veur leve en vruchtbaarheid en roed steit veur de leefde en wermte, dus ouch de leefde en de wermte die ’t nui kinneke, Slivvenier, kump bringe in de keerstied.
Dus de kleur roed, vermink mèt hiel väöl werm leech, missteit daan toch ech neet in de keerstied. De keersbuim doen de res.
Jan Janssen
