Inhoudsopgave
Vreuger hadde veer thoes, wie iech nog keend waor, altied ‘nen hoond in hoes. Mien mam zoch ummertouw de mies exotische naom veur die bieste oet. Vlak nao d’n oorlog hèdde d’n hoond netuurlek Jimmy want de Amerikaone hadde us jummer bevrijd en mós d’n hoond ‘nen naom höbbe dee Amerikaons kloonk. Daonao koum Flossie, ‘ne keeshoond en later kaome Teddy en Uschi in hoes. De lèste twie waore teckels, eine ruwhaorege en ein korthaorege.
In de loup vaan de jaore höbste de verzörging vaan die bieste zien verandere. Flossie kraog gewoen te ete wat de pot sjafde. Ete dat waors euvergebleve woort oonderein gemaak en dat kraog Flossie te ete en dat ete doog heer mèt plezeer. In d’n tied vaan Flossie hadde veer ouch nog ’n kat in hoes die de miesten tied doorbrach mèt urges te ligke en te slaope. Leefs op e pläötske, zoe hoeg meugelek, tot ze gein las had vaan Flossie dee aoventouw wel ‘ns wouw speule. De naom vaan de kat kin iech miech neet mie rappelere meh get aanders es Miemke zal ’t wel neet gewees zien. Ouch zij aot wat de pot sjafde.
Wie reklaam op d’n tèllevisie kaom zaog me de verzörging vaan de bieste verandere. Op d’n tèllevisie lete ze zien en hure tot hun en katte get aanders móste ete es wat lui gebrukelek aote. Tot zaoterdags, bij de wekelekse kemissies, väöl hoondeleefhöbbers ouch vroogte um get slachaofval, zoewie hart en lever, waors inins neet good mie. Wodan en Hector hunne maog mós aander dinger goon verdrage. ’t Liefste netuurlek de dinger die aongebooje woorte via de advertentie.
Zoe kaome opins de blikskes mèt hoonde- en kattevoor in hoes. Flossie, Teddy en Uschi maakde dat gein fluit oet es ze mer get te ete kraoge. De advertentie-jonges en meidskes wete oonder de hand tot hiel väöl lui bieste in hoes höbbe en hun bieste gere optimaol wèlle verzörge. Dus bedinke die jonges en meidskes de gekste dinger veur de bieste en dus koupe veer veur Wodan en Hector, ouch netuurlek veur de Miemkes en Minoeskes, good voor en speulgood vaan de advertentie.
Zelf höbbe veer ’n aontal jaore ’n aonloup-kat gehad. Zij, de kat, had us oetgekoze um veur häör te zörge. Eus kleindochter Iris bedach tot die kat Roosje mós heite en dus kaom Roosje bij us in hoes. Roosje had e good leve en oetindelek móste veer Roosje laote inslaope umtot ze doedkraank waors gewoorde. Bij de biestendokter kaome veer op de lèste menute vaan Roosje nog d’rachter tot Roosje eigelek e jungske waors en ’t jaore mèt ‘ne meidskesnaom had mote doen. Dat heet Roosje trouwens noets get oetgemaak.
Trouwens Roosje aot voor oet gekochte blikskes en kattebrokke.
Boe iech nog ummer neet aon kin wene is e kuitske veur hun. Zeker neet es ’n kerel wie ‘ne boum achter dat kuitske luip en e hiel klein hunneke ziech liet roondrije um de veer puutsjes te spaore.
Wat reklaam allemaol teweeg kinne bringe, ’t is oongeluivelek!
