Nostalgie

Inhoudsopgave

Urges bij ’t blaajere in de pepèrre gezèt veel mien oug op ’ne foto vaan manslui die in ’n appartemint zaote mèt ‘ne gewelfde plefong. Bij ’t leze vaan ’t bijbehurende artikel kaom iech d’rachter tot die manne ’n appartemint hadde gekoch in ’t Sphinxgebouw bove Loods 5. In e gries verleie höb iech dao, in de jaore zèsteg, ouch ‘ns roondgeloupe, drei weke um persijs te zien.

Miene noonk Louis wèrkde op de Sphinx en mien ma had aon häöm gevraog of iech op de Sphinx vekansiewèrk kós doen. Dat waors good en dus moch iech miech in alle vreugte, op ‘ne maondagmörge, mèlle bij de Sphinx. Iech woort aongenome veur drei weke en kraog, iech bin ’t jaomergenóg kwietgeraak, e pepier oetgereik boe allerhande zakes op stoonte die iech neet moch doen op straffe vaan geldeleke boetes. Sakkere (vloeken) moch beveurbeeld neet, speie ouch neet en dat kósde diech daan e döbbelsje en erger zakes e wöllemke. E gans blaad vol. De waors dus gewaarsjouwd.

Iech kaom, mèt mien boterhammetrömmelke, in ’t gedeilte bove Loods 5 vaan allewijl terech. Dao zaot menier Knippa. Menier Knippa waors d’n oontwerper vaan vaste wastaofels en toilètpöt, wat iech miech nog kin rappelere. Heer zaot ederen daag te teikene en te riddenere.

Menier Knippa had hoonderde teikeninge gemaak en welliech ouch veurgengers vaan häöm. Alle die teikeninge woorte bewaord in ’n arsjief en laot dat arsjief noe in d’n tunnel oonder de Boschstraot e pläötske höbbe. De vraog vaan menier Knippa waors of iech dat arsjief wouw opruime en alle teikeninge opnui op volgorde wouw haange. Iech höb dus get daog doorgebrach in d’n tunnel oonder de Boschstraot. Riggelmaoteg kaome lui langs die vaan ’t febrik nao ’t tummerfebrik of umgekierd móste en die daan eve kaome loere wat iech aon ’t oetspoke waors.

Tege etenstied ging de groete toet vaan ’t febrik en kaom miene noonk Louis miech hole um same in ’t tummerfebrik de boterhamme te goon ete. Daan waors eve daagleech te zien um daonao weer in d’n tunnel te goon wèrke. In de naoventrint vaan ’t arsjief laog sjijns ‘ne pötdeksel in de Boschstraot want eder gemeintebös die euver de pötdeksel rijde hoort iech oonder in d’n tunnel.

Wie iech de foto vaan die manslui zaog mós iech aon deen tied trökdinke en aon de plaots boe dsetijds de moulemekers de geetvörme vaan de wastaofels en toilètpöt zaote te make, nao ’t oontwerp vaan menier Knippa, in dat gedeilte vaan de Sphinxbouw.