Inhoudsopgave
’t Moot gewoen ederein zien opgevalle: In stadion de Geusselt weurt de “spektakelmusical de Bokkenrijders” in de maond juni gespeuld. Mèt dizze musical weurt e stökske historie vaan eus eige umgeving oetgeliech. E stökske historie dat neet geweldeg waors veur de lui die toen leefde in dees contreie.
D’n tied vaan de Bokkenrijers waors geine fijnen tied. Ermooj speulde ’n groete rol in ’t leve vaan hiel väöl lui. Kinderkes die storve vaan d’n hoonger maakde de situatie nog väöl erger. De landhiere en de geistelekheid trokke ziech wieneg aon vaan d’n ermooj vaan de lui en dege dèks nog e sjöpke bove d’rop door hun nao te zitte mèt belastinge die de lui mooste betaole. Belastinge euver ’t land dat ze gepach hadde en belastinge euver d’n opbrings vaan dat land. Dèks mislökde d’n oogs meh dao hadde de landhiere gein kemissie aon en zoe woorte lui oetgezoge door de landhiere die e good en riek leve wouwe höbbe. ’t Gevolg waors dus: ooncontent volk dat in opstand kaom en trök perbeerde te hole wat hun oonterech waors oontnome.
D’n tied vaan de Bokkenrijers waors veur de lui ‘nen duusteren tied. Väöl legendes en spookverhaole dege de runde. Es ’t vreug duuster waors in ’t naojaor en in de winter waors dat ‘nen naorgeistegen tied. In d’n duuster speulde ziech vaan alles aof wat ’t daagleech neet kós verdrage en dao pasde de Bokkenrijers perfect in. Es ’t wejde of störmde vloge de wolke langs ’t firmamint en iemes dee dao get aanders in wouw zien, kós heer dao zien eige fantasie op loslaote. Dus es akelege dinger gebäörde en ’t wejde wie ‘ne gek daan kóste lui dao, mèt get fantasie, vlegende bokke in herkinne. Zoe oonstoonte dus legendes en spookverhaole euver bendes die op bokke door ’t firmamint ziech kóste verplaotse.
Woersjijnlek bestoonte in deen tied, roond 1720 tot 1780, versjèllende bendes in eus contreie die mèt riggelmaot op ströptoch ginge um de landhiere en de geisteleke te euvervallle umtot bij hun get te hole veel.
Op hun beurt perbeerde zij die bendes op te rolle. Daodoor woorte lui opgepak, dèks op verdinkinge die neet zuver en terech waore. Dat waors evels gein inkel probleem want me had destijds versjrikkeleke methodes um lui aon ’t praote te kriege. De “duimsjroeven aondrejje” waors ’t mins erge wat ze ‘ne mins kóste aondoen. Oetindelek, naotot de mins bekind had, woort ‘t vonnis geveld en woort hiel dèks bepaold tot iemes mós weure opgehaange.
Op dees wijs woorte hiel get lui in deen tied, terech en ouch väöl oonterech, opgehaange umtot ze gemarteld waore en door de pijn mer touwgaove tot ze get gedoon hadde.
Minselek leid heet dus in deen akelegen tied ’n groete rol gespäöld in eus ontreie. De verhaole en de mysteries zien gebleve en inspirere de lui tot op d’n daag vaan vendaog.
