Inhoudsopgave
De Belsje kös kós bès e stökske vaan Mestreech zien. Veer waore dees week weer e paar daog in Oostende. Regelmaoteg huurste dao in de winkelstraote Mestreechs. En eve dèks huurste iemes zègke: “Geer ouch hei? Eve oetweije aon de zie en daan weer trök nao klasjenere? Eve e terreske pikke en ‘ns lèkker ete. ’t Is hei zoe gezèlleg, neettaan?” ’t zouw zoe e verlengstök vaan Mestreech kinne zien.
Inderdaod geit me nao de Belzje kös um eve in ’n aander umgeving te zien. Thoes is altied get te doen en dao heet me dao get minder las vaan. Probleme zal dao ouch wel zien meh in die paar daog tot me dao is heet me geinen tied um ziech daomèt bezeg te hawwe. De vèsaofdeiling bij Delhaize is väöl interessanter daan alle dee kwatsj vaan thoes.
Es iech de beriechte lees euver de welstandskemissie in Mestreech daan dink iech tot me in Belzj dao gans aanders euver dink. In eus wandeling langs de kös zuut me allemaol apparteminte die neet opein gelieke. Alles is aanders. ’t Eint heet balkons, ’t aander neet. ’t Eint heet staole raome, ’t aander kunsstof of hout. Maak neet oet en de Belzje vinde ’t sjoen. Aofspraok is evels tot me neet hoeger maag bouwe es 9 etages langs de kös en dat lök vrij good. Wat ’n straot weier gebäörd is aandere kook. Langs de weeg nao Middelkerke stoon sins e paar jaor gebouwe die väöl kiere hoeger zien. Dat heet es veurdeil tot es me ’n hoeger etage köp me euver de apparteminte aon de kös kint loere en dus oetziech op zie heet. De Belzje höbbe zoe euveral ’n oplossing veur. Slum volk is ‘t!
De Belzje zien e Bourgondisch volk. Tege 12 oor beginne de restaurants ziech te völle en zuut me de lui aon de lunch zitte. E wijnsje debij en genete wat ’t leve te beeje heet. Veer zien dao get aanders in. Tösse de middag weurt gegete meh neet oetgebreid wie dat aon de Belzje kös ’t geval is. Me heet in Belzj d’n tied en pak ’t ziech devaan. Daodoor kump ’t leve get rösteger euver es bij us.
Wie veer um 5 oor eve e terreske pakde, kaom ’n awwer stèl ouch eve zitte. Heer leep mèt ‘ne wandelstèk en zij mèt ‘ne rollator. D’n ober kaom mèt twie gleeskes prosecco en ’n poorsie bitterballe. Ze leten ’t ziech good goon. ’t Hierke had de baakbiljètte los in zien broketès. Naoderhand sjove ze ’n aontal restaurants op boe ze ginge dinere. Dat is sjijns de Belzje meneer um d’nen daag op plezerege wijs aof te slete. Zoe’nen awwen daag wins me ederein.
Este daan ‘nen daag later weer riechting hoes reis daan biste al bezeg um de volgende kier Belzje kös te planne. ’t Is hei gewoen zoe aanders!
Van onze redactie
