Inhoudsopgave
Vastelaovend zaoterdag is toch ‘ne bezunderen daag in Mestreech. Dudelek is in de stad te merke tot ’t volk vaan Mestreech de mach krijg. ’t Volk is deen daag altied get rebels. Langs de rôt vaan de stadsprins weurt door hiel get lui gerope: “Geef ze vaan ketoen! Toek die vaan us mer ‘ns flink, ze höbben ’t verdeent!”.
’t Toeke is toch ’n bezunder traditie is Mestreech. Alles wat “die vaan us” ziech door ’t jaor höbbe laote invalle um ’t volk vaan Mestreech te transenere moot daan op zoe’ne middag door d’n toeker nao väöre gebrach weure. Heer steit dao naomes ’t volk vaan Mestreech en de stadsprins dee hunne leier en veurgenger is in de koumende drei benkeleke mer plezerege daog.
In hiel väöl plaotse sprik me vaan sleuteleuverdrach en krijg prins carnaval ouch ‘ne sleutel euverhandeg. In Mestreech krijg de stadsprins geine sleutel meh heer krijg oet han vaan de börgemeister de zèlvere scepter euverhandeg. ‘ne Scepter is ’t teike vaan mach en dus dreug de börgemeister de mach euver de stad euver aon de prins. Zoe gaw es de prins de mach heet lees heer zien troenreie veur en liet ’t volk vaan Mestreech wete wat heer de koumende daog vaan hun verwach.
’t College is ziech netuurlek, wie eder jaor, vaan gei koed bewus. Ze zien devaan oetgegaange tot ze noets foute make, alles good doen en veur de lui in Mestreech ’t oonderste oet de kan höbbe wete te hole. Waors dat mer zoe!!! Zelf zinge ze ‘ne lofzaak euver alles wat ze zoegenaomp veurein höbbe gekrege meh ’t erm volk vaan eus gooj stad is e jaorlaank gebuk gegaange oonder alles wat zij ziech bedach hadde. ’t College heet gein idee wie ’t volk nao beter tije verlangk en die stoon d’r vaanaof zaoterdag en de koumende drei daog gelökkeg aon te koume.
Oet de troenreie vaan 2019 kloonke toen de volgende verstendege prinseleke wäörd:
Eus Treech, de sjoenste oonder de sjoene,
boe Geis en Mooswief al jaore troene
boe plezeer en sjariteit e verbond höbbe gesmeid
dat in eder Treechter hart zoe good gedijd
dat gief us ’t geveul: Veer zien de prins te riek
want drei daog laank is ’n ederein geliek.
Veer leve in eus Treech op ’n gouwe wolk
zeker noe de mach is aon ’t volk.
Veer zegke daan ouch zoonder väöl besjaar
daorum dreug eus veendel die zèllevere staar!
Neump us ezzebleef neet egoistisch
en al gaar neet chauvinistisch
veer kinne jummers niks draon doen
euze Vastelaovend ruile Veer veur gei mieljoen.
De cramignon geit zoe astrein beginne, Veer veurop
en dinsdagaovend koume Veer mèt z’n alle pas stop!
Jan Janssen
