Inhoudsopgave
Iech laos lès tot d’n horeca en op vekansie goon hiel erg deur zien gewoorde. Haos oonbetaolbaar zien gewoorde. Toch is dat neet ziechbaar of verdaol iech miech? Iech loup riggelmaoteg op de laten aovend door de stad meh iech zeen de kaffees en de restaurant allein mer vol zitte. Daan dink iech: “Oondanks tot ’t deur is gewoorde goon neet minder lui oet ete of ziech eine drinke.” Dat heet netuurlek te make mèt de gezèllegheid die mèt ’t oetgoon te make heet.
De horeca gelegenhede in eus land zörge veur sfeer en gezèllegheid. Es de kwaliteit vaan wat ze te beeje höbbe ouch good is daan is gooj en contente klandisie ’t directe gevolg.
’t Gekke is tot veer dat in aander len neet zoe direk waardere. Es me in Zuid Frankriek e kaffeeke opzeuk zit me dèks bij ’t leech vaan ‘nen tl-balk ze pötsje beer of wijnsje op te drinke. Thoes gekoume vertèlt me mie es eine kier wie gezèlleg dat waors um gewoen tösse de Franse te zitte. Dee tl-balk interesseert daan gaaroet neet.
Op vekansie goon is al neet aanders. Iech huur verhaole vaan lui die nao de mies exotische len op vekansie goon. Me wèlt cultuur opsnouve en mèt eige ouge zien wat aander len en culture te beeje höbbe. Dat is eder ze good rech, meh ’t is neet gooje koup!
Veer zien ouch planne aon ’t make. Fraankriek en Italië vinde veer sjoen len um op vekansie te goon. Eve weg vaan ’t normale en eve ’n aander taol spreke. En netuurlek ouch aander ete perbere.
’n Aontal jaore geleie waore veer in Fraankriek op vekansie en veer ginge oet ete. Dat waors in d’n tied tot veer nog geine mobielen tèllefoon hadde en dus niks kóste opzeuke. De menukaart waors dus ‘ne puzzel en me perbeerde zoe good en zoe koed meugelek d’roet wies te koume wat ’t restaurant te beeje had. Eus dochter wouw gere frietsjes en e weurske. ‘Andouillette’ leek us ’t mies gesjik. Nao ’t ierste preufke trok ze e vies geziech en zag ze tot ze dat neet hoofde. Ederein aon taofel heet daonao andouillette (dikke derm en get greunte) gepreuf meh dao bleef ’t bij. ’t Ging trök nao de keuke en ederein wèt vaan deen tied aof tot andouillette neet mie op ’t verlanglieske steit.
Door de mobielen tèllefoon vaan tegeswoordeg wèt noe ederein wat heer bestèlt. Me zeuk ’t op en krijg direk vertaold antwoord. De spijskaart heet gein geheime mie en dat nump toch get vaan de charmes vaan vreuger weg.
Veer goon dinkelek nao Italië um aon de Middellandse zie e tiedsje te blieve en daonao euver te steke nao de Adriatische kant vaan de Laars.
Dat weurt weer staond koffie drinke en saoves in ‘nen trattoria of osteria get lekkers te ete zien te kriege.
Naoderhand koume daan de verhaole tot ’t allemaol gezèlleg, sjoen en bezunder waors en tot de prijze belachelek goojekoup waore.
