Inhoudsopgave
E paar jaor geleie höbbe veer veur de stasie vaan Mestreech ’t groete kojl gemaak um dao ’t fietsestalling te make, oondergronds. Dat moos wel want ’t aontal fietse dat zoemèr urges neer gezat woort veel de spuigate roet. Dus kaom dao ’n sjoen fietsestalling en ’t verzeuk aon alle die fietsers hun hun fietsiezer dao te stalle.
Me dach tot dat e succes ging weure meh dat waaors minder woer. Op de pleinsjes in de Stationsstraot woorte de fietse geplaots vaan de lui die of te laat veur bös of trein waore en gaw hunne fiets kwiet mooste, of te lui waore um de fiets nao oondere te bringe, of neet wouwe betaole veur ’t stalle vaan de fiets. Veer höbbe dus ’n manjefieke stalling meh haos gein fietse in de stalling, dus e groet probleem.
Door rigoureus te handhave zien op dit memint haos gein fietse mie te vinde op de pleinsjes in de Stationsstraot. Dat heet ziech sjijns opgelos al is bij de fietsestalling nog ummer te leze tot d’r haos 1400 leeg plaotse in stalling zien.
Wat is noe evels ’t geval? Aon d’n achterkant vaan de stasie kint me in ’t weekend haos neet mie loupe want dao weure noe alle fietse gepland. Sjots en sjijf stoon dao alle fietse in de rekke, boete de rekke, in de beplanting, op de scooterplaotse, etc. etc.
Me vreug ziech aof: höbbe veer de oondergrondse stalling noe wel aon de gooje kant vaan de stasie gebouwd? Had die neet aon de Meerssenerweeg mote ligke?
Me kint ziech ouch aofvraoge: Wat mote veer noe weer verzinne um alle die lui die hunne fiets aon de Meerssenerweeg zètte in ’t weekend nao d’n aandere kant vaan de stasie te kriege um dat dink dao te stalle? In eus land promote veer al jaore ’t gebruuk vaan de fiets es milieuvruntelek vervoermiddel meh dao zitte dus ouch de nudege naodeile aon. Me kwak dat dink gewoen urges deneer in d’n hoop tot ’t dao zoondagaovend of maondagmörge nog steit. Tot aander lui dao las vaan höbbe zal eus, zelfs in de winter, ’n zomerzörg zien.
Sjaggernere heet geine zin want dao verander’ste niks mèt meh ’t is toch e probleem want ’t aontal fietse aon de Meerssenerweeg nump eder weekend touw. D’n ingaank vaan de stasie weurt volgebouwd en lèsteg touwgaankelek veur lui mèt ’ne rolstool, scootmobiel of kinderwage. D’r zal dus op termijn ’n oplossing mote koume. Mie plaots is d’r neet!
’t Plan ligk d’r um ‘t aontal spoorstave te vermindere en dao euver ‘nen tied hoezer te goon bouwe. Iech wouw zègke: wach neet te lang en begin noe en maak alvas get nui fietsestallinge. Dat hölp. Alloh … aon de geng NS!

Al ons nieuws is en blijft gratis, maar waardeert u ons werk, steun dan De Nieuwe Ster.