Inhoudsopgave
Water is e raar produk aon ’t weure of vertèl iech noe get verkierts? Jaorelaank höb iech de kraon ope gedrej zoonder daobij nao te dinke. Es keend waors dat de normaalste zaak vaan de wereld, de kraon opedrejje en knuddele mèt water. Zeker es ’t werm weer waors mochte veer vaan thoes oet water pakke um dao mèt te speule.
Thoes hadde veer ’n zinke bak mèt oere en dee woort daan gevöld. De zwumbrook ging aon en daan kóste veer, mien broor en iech, us ore ammezere in ’t water. Es veer klaor waore woort euzen hoon douch nog ‘ns gesóp in de koep en zoe had ederein de nudege aofkeuling die nudeg waors um weer gewoen mins te weure.
’t Water woort oetindelek euver de bleik oetgegoejd en daodoor verbrande ’t graas neet en de plante in de borders genote mèt vaan die klats water. D’n daag denao volgde ’t zelfde ritueel en zoe kaome veer de zomer door.
De bleik kraog trouwens op maondag ouch de luter vaan ’t wasmachien te drinke, dus water waors gei probleem en me ging devaan oet tot ’t groondwater dao ouch perfiet vaan had.
Allewijl is water ’n aander verhaol gewoorde. Pas geleie hoort iech tot oondanks alle rege dee veer euver us heer höbbe gekrege ’t groondwaterpeil nog ummer te winse euverliet. ’t Gewinsde nivo is neet um euver nao hoes te sjrieve. Gei woonder dus tot iech de tuinslang angsvalleg in ’t hok laot haange en te besjete bin um de plante in d’n hoof ‘ns good vaan water te verzien.
Veer höbbe nogal get hortensia’s in d’n hoof stoon en daan hoof iech uuch neet te vertèlle tot dat zoeplep zien. Hortensia’s kinne drinke vaan de vreuge mörge tot de laten aovend. ’t Rizzeltaot is tot ze prachtege blómme laote zien meh dat is noe neet ’t geval. De hits vaan de aofgeloupe hitteperiood heet zien spoor achtergelaote en de blaajer broen laote verkleure.
Aoventouw völ iech noe de spruit um die plante vaan get water te veurzien in d’n hoop tot ze in 2027 euzen hoof nog ummer vaan kleur zalle laote straole.
Veur us zelf höbbe veer broesjwater goon koupe. 39 cent de fles kós dat water dat volges ’t etiquèt urges oet Fraankriek kump. ’t Is lekker en ’t smaak, zeker es ’t gekeuld oet de ieskas kump. Gek hè, want vreuger drejde veer thoes gewoen de kraon ope en droonke e fris glaas water oet de kraon en dat smaakde perfek.
De vraog is noe: goon veer zoe aanders um mèt water es vreuger. Iech zeen niemes mie zienen oto op zaoterdag wasse mèt de tuinslang. De wasmachiene zien aongeslote op ’t riool en verbruke wieneger water zeet me, dus wie zit ‘t?
