Inhoudsopgave
Es iech op dit memint nao boete loer daan zeen iech de zie, de Belsje zie al zal ’t water vaan de zie dat geine kloet oetmake. Vendaog klots ’t water hei en mörge klots ‘t urges aanders. Dat is ’t water geweend te doen. Ouch zal ’t water ’t niks oetmake wee mèt zien veuj in ’t water steit. Zien dat noe Belsje, Hollandse of Franse veuj. ’t Is ’t water um ’t eve, zweit veuj zien zweit veuj en ’t water zal dinke: “d’r is al genóg zweit in de wereld dus ’n zweitvoot mie of minder maak miech niks oet”.
’t Zal de zie ouch niks oetmake of dee voot bij ein vaan doezend weke huurt of tot ‘t ‘ne voot is vaan iemes dee dao al tachteg jaor op rond löp. De zie maak dat niks oet. ‘t Maak de zie zelfs niks oet wee zien vot in häör water sóp. Water genóg zal de zie dinke.
Iech dink tot ’t de zie zelfs niks oetmaak wie väöl vèsse in häör water rond zwumme. Zelfs versjèllende soorte vèsse maak de zie niks oet. Edere vès is welkom. Oets gaof ‘t ‘ne bloonte vès dee … meh ‘t ziewater nump alles wat dee vès zeet mèt e körrelke ziezaajt.
De zie maak ziech wel drök euver ’t feit tot ’t aontal vèsse ummertouw minder weurt meh ’t ziewater zit dao neet mèt zoelang es ’t mer ederen daag eb en vlood is. Soms höbbe die twie, zie en ziewater, ruizing en daan kin ’t wel ‘ns störme. Zelfs zoe erg tot sjoem op ’t ziewater te zien is meh ziesjoem heet ouch zien leuke kante.
Es iech aon de rand vaan ’t strand nao ’t ziewater loer daan kinste allein mer concludere: ’t water vaan de zie bringk de ein menuut get en de aander menuut nump ’t get mèt. In ’t leve is ’t neet aanders: de ein menuut bringk ’t get en de aander menuut lievert me get in.
Dat zien, dink iech daan zoe bij mien eige, vekansie gedachte. In de aander maonde vaan ’t jaor zal iech miech gein gedachte make euver ’t water vaan de zie meh es iech miene kop ‘ns leeg gemaak höb daan koume gedachte euver ziewater inins bij miech op. Iech staon daan raar te loere vaan mien eige meh dat moot daan ouch mer ‘ns kinne.
De zie blijf e fenomeen boe me noets op oetgekeke raak. Eder menuut is de zie aanders en es ’t effe kin goon veer e paar daog nao de zie um op verhaol te koume en um dizzen oonzin te sjrieve. Iech daon uuch de kompleminte vaanaof de Belsje kös.
Jan Janssen
