Inhoudsopgave
Aon ’t viere vaan de bevrijding ginge iers bekans vief jaor vaan angs, oonderdrökking en hiel väöl leid veuraof. Jaore tot me ziech oonderein neet kós vertrouwe. Soms speulde dat ’n groete rol en woorte lui die oondergedoke zaote op ’t lèste vaan d’n oorlog nog gevoonde door de vijand en op transport gezat. Verraoje door lui oet de naoventrint um ein of aander duuster reie. De lui die oonderdaank hadde gebooje waore ouch de klos en mooste lije umtot ze hunne naoste hadde geholpe. Wie versjrikkelek moot dat zien gewees en wat beteikent daan de bevrijding, ’t los koume vaan de oonderdrökking en de angs.
Wieväöl leid weurt daan op zoe memint neet weggemoffeld door lui. Leid dat aanders wón opnuits ope rit en obbenuits pijn deit. Pijn die noets weggeit en bij nach en oontij de kop opstik. Aon dat soort angs dink me liever neet mie.
In de straot boe iech bin opgegreujd stoonte aon de kant vaan de Meerssenerweeg drei aander hoezer es in de res vaan de straot. ’t Einzigste wat dao euver gezag woort waors ’t feit tot dao in d’n oorlog oets ’n bom terech waors gekoume. Op die plaots had me drei nui hoezer gebouwd. Weier woort euver ’t minseleke leid dat dao had plaotsgevoonde noets get vertèld. Dat woort weggemoffeld. Dat waors te pienlek um dao aon trök te dinke.
Maondag viere veer bevrijding. 80 jaor geleie woort Nederland bevrijd. Mestreech waors al in september 1944 bevrijd meh de res vaan ’t land mós nog d’n hongerwinter euverleve. Hei in ’t zuije woort nog eve d’n aosem ingehawwe vaanweges ’t Ardenneoffensief. Zouwe de geallieerde ’t winne of zouw ’t aanders oetvalle? Dat waors nog eve de vraog die de lui bezeg heel.
De jaore daaonao höbbe de lui ziech bezeg gehawwe mèt ’t obbenuits opbouwe vaan ’n sjoen touwkoms veur Mestreech. Mestreech is gegreujd en is noe ’n plezerege plaots um te woene en te leve.
Zoondag stoon veer op ’t Keuningsplein bij ’t Limburgs bevrijdingsmonumint. Veur alle slachoffers vaan die versjrikkeleke jaore hawwe veer twie menute stèlte. Maondag steke veer de vlag oet um de bevrijding te viere in d’n hoop tot us zoeget noets mie zal euverkoume.
Dao ligke ze
koper gepóts
blinkend in de zon
mer wat zègke ze us?
wat zègke ze de jäög?
4 stolpersteine aon ’t Tongerseplein.
Hei woende:
Elisabeth
Emanuel
Louis
Friederike Gobes
10 september 1943 Auschwitz
Dao boe de spoorstave opheelte te bestoon
dao boe hun leve opheel te bestoon
boe de krankzinnegheid zegevierde
’t respek veur de mins de deur achter ziech had touwgetrokke
veur hun kaom de bevrijding te laat
Veer…
veer mochte viere
de euverwinning waors aon us
de vrei kaom weer bovedrieve
oetindelek kaom de rös weer trök
’t vertrouwe in diech en miech
Laot dit noets mie gebäöre
Noets mie… noets mie… noets mie!
Jan Janssen
