Inhoudsopgave
Dit thema steit dit jaor bij de zevejaorlekse Heilegdomsvaart centraol. Wie iech dees week in de gezèt laos wie e deil vaan de lui dink tot me mèt aander lui moot umgoon daan kump dit thema good vaan pas. Via de moderne media vinde get lui tot ze alles, meh daan ouch alles, mote, kinne en mage zègke. Ze kóstse ziech hielemaol leeg en laote daomèt zien tot ze gein inkel respek höbbe veur aander meininge en aander gedachtes. Allein hun meining tèlt en dao heet ederein ziech mer op aon te passe.
In de polletiek is ’t dèks al neet väöl aanders. D’r zien lui in de polletiek die allein hun meining de zjuste meining vinde en dat door dik en dun blieve roondbazuine. Democratie hèlt evels zjus in tot me nao ein luustert en same nao de gooj en miesbruukbare oplossing zeuk wat good is veur ederein en tot niemes gedupeerd weurt door e besluut. Veer mote same kinne leve in rös en vrei. Same op fetsojndeleke wijs aajd kinne weure en gezoond kinne blieve. De wereld is vaan niemes, veer zien allemaol mer hiel eve te gas.
’t Thema vaan de heilegdomsvaart vraog us um brögkebouwer te zien en respek te tuine veur de aander lui. Gef aandere ’n hand, ’n knipoug of ‘ne lächske. Veer zien allemaol mer lui vaan vleis en blood. Eder heet zien eigenaordeghede. Allemaol make veer foute meh um dat touw te geve is dèks lesteg.
Astrein stoon veer allemaol langs de kant nao de ommegange te loere. Dat gief e geveul vaan same zien. Dat höbbe hiel get lui toch mer weer veurein gebóks. E kleurriek showspeul trek aon uuch veurbij en welliech dink geer daan neet aon ’t thema “Wees een bruggenbouwer” meh allein al dat samezien maak us weer gruuts op wee en wat veer zien, Mestreechternere.
Ins in de zeve jaor viere veer de Heilegdomsvaart. Dit jaor mèt e bezunder thema dat hiel väöl lui in en boete Mestreech aonsprik. Zeker noe de wereld in brand steit is ’t zaak tot veer ’t hei good höbbe oonderein. Iech wins uuch ’n sjoene en zinvolle Heilegdomsvaart, get um euver nao te dinke.
Jan Janssen
