Inhoudsopgave
Binnekort kin me hiel eve mer de Bonbonnière bezeuke um te zien wie ’t gebouw op dit memint debij steit. De belangstelling zal groet zien, num iech aon, want hiel get Mestreechtenere höbbe naomelek plezerege herinneringe aon dat gebouw en zalle wèlle zien wie ’t noe is. Hiel get Mestreechter historie stik in dat gebouw. De ierste opveuringe vaan de Kaptein vaan Köpenick, Trijn de Begijn en nog väöl mie höbbe dao plaots gevoonde. De Momusse en de Tempeleers höbbe dao vreuger de nuie stadsprins oetgerope. De Prinsebals voonte dao plaots, de legendarische Kemediespeulers trooje dao op, de Mestreechter Operette Vereiniging en ’t Mestreechs Volkstejater gaove veurstellinge in dee theaterzaol. ’t Waors dèks behellepe umtot de ruimte beperk is en klein meh dat had zien charmes.
Welliech speule alle nostalgische gedachte de Mestreechtenere parte noe ’t pand al alle die jaore geslote is en get verwaarloes debij ligk.
Eder zal dao zien bezunder gedachte bij höbbe. Iech rappeleer miech persoenelek de veurstellinge vaan “Mie Fien Mamzèlke”. Ederen aovend zaot de zaol tot op de lèste stool nao gans vol. Dat hoort me es toneelspeuler achter ’t veurdook meh me dorf daan neet te loere door de speelte in ‘t dook wee d’r allemaol waor want de theatertraditie zag tot dat oongelök zouw bringe. De hoofrolspäölster leep, oonder de ouverture, op en neer euver de bühne umtot ze ’t geveul had tot ze naor ’t huiske mós. Dat waore ederen aovend de zenewees want zoe gaw es ’t dook ope ging waors deen drang weg en späölde ze de stare vaan d’n hiemel. In d’n orkèsbak zaote de muzikante oonder leiing vaan dirigent Willy Hageman. Zelf moch iech de maan oet Heerle speule aon ’t begin vaan ’t stök. Mienen tèks kin iech nog druime: “Als dat u alles weet, ken u dan ook zègge waar of ik vandaan kom???”. “Uwes? Uwes komp uit Heerle”: waors ’t antwoord vaan Phil Dumoulin en daan moch iech zègke: “Verrek, die vent weer alles!” Netuurlek op ziech Heerlens/Hollands. Zoe is mien carrière oets begonne in deen heerleke theaterzaol vaan de Bonbonnière.
Gans Mestreech hoop tot binnekort ’n oplossing gevoonde weurt veur dee prachtege zaol en de aander ruimtes in dat gebouw en tot veer obbenuits kinne genete vaan dat nostalgisch gebouw. 13 en 14 september gebäört vaan alles in dat gebouw en kint me in ’t kader vaan Ope Monuminte Daag ’t gebouw bezeuke. Wel moot geer uuch iers aonmèlle.
Same mèt de Avantikapèl en Maos en Neker hoop iech uuch dao op 14 september te treffe. Tot in de Bonbonnière, zalle veer mer zègke!
Jan Janssen
