Inhoudsopgave
Maondag is de groeten daag veur väöl kinder umtot de sjaol weer begint. Lang opblieve en ravotte tot saoves laat is daan neet mie debij. Op tied nao bèd en op tied weer opstoon is daan weer aon de orde vaan d’n daag. Riggelmaot is e sjoen dink en veur väöl lui noedzaak.
In de nudege winkels kinne de kinder nui sjaolsartikele koupe. Dat is gouwe business want de kinder wèlle toch allemaol good veur d’n daag koume. Nui pennemepke, nuie gum, nui potloed en veural ‘ne nuie agenda.
Iech weet nog wie iech zelf zoe dink veur d’n ierste kier kraog. Dat woort neet gekoch, nein, dat kraoge veer vaan sjaol bij de Broeders vaan de Beyart. Veurop stoont ’n aofbeelding vaan d’n heilege Aloysius en binnenin stoont ’t sjaolreglemint. Op d’n iersten daag vaan de sjaol woort de lèsruuster in de agenda gesjreve. Eder oor ’n aander vak en ‘nen aandere meister of broeder. Dat waore veer op de liegere sjaol gaaroet neet geweend en dat waors dus eve gans aanders. De ierste daog waors dat eder oor weer ’n verrassing wee noe weer binne kaom loupe.
Bij us op sjaol leep broeder Egidius Veenhof roond. Dee broeder gaof gymnastiek, typlès en waors studiebegeleider bij de aovendstudie. Es heer gymlès gaof had heer e blauw kostuum aon en bij de aander vakke droog heer zien habijt wie de aander broeders. Iech weet nog tot ’t e tiedsje doorde ie iech door had tot dat ein en dezelfde broeder waor en neet, wie iech dach, ‘nen twierling waors.
D’n agenda invölle waors ouch e dink. Wienie kaom e vak weer aon de orde en daan mós me d’n daag daoveur ’t hoeswèrk make en de bijbehurende dinger vaan boete liere.
Exame woort gedoon in hiel väöl mie vakke es tot dat allewijl ’t geval is. Nederlands, Duits, Frans en Ingels. Rekene en economie. Daan algebra en meetkunde. Geschiedenis, aardsrijkskunde, biologie, teikene en godsdeens.
De mieste vaan eus klas woorte klaorgestoomp um nao de kweeksjaol te goon en oonderwijzer te weure. Dat zien ‘rs ouch hiel väöl gewoore meh geine vaan mien klas is broeder gewoorde.
Door de jäögsociëteit “de Kollefit” zien veer wel nog jaorelaank aon sjaol verbonde gebleve. Aw klassebeuk, mèt de rapportciefers vaan alle jonges vaan mien klas, höb iech oets gekrege vaan de broeders en die bewaor iech nog ummer wie ‘ne rillekwie es aondinke aon dee sjoene en plezerege sjaoltied op de Beyart.
Jan Janssen
