Inhoudsopgave
Gezeen ’t gebäöre in Iran en de naoventrint is aon olie e tekort aon ’t oontstoon. Amerika en Israël zien aon get begonne meh tot dit ’t rizzeltaot zouw zien hadde ze neet verwach, dink iech zoe. Ederein veult noe de gevolge vaan dit impulsief gebäöre vaan die twie len. Geinen olie beteikent geine benzien, geinen diesel en tekort aon gaas. ’t Raak ederein direk in de portmenee en hiel väöl lui die ’t al neet breid höbbe koume in de miserie hei door.
De regering is veurluipeg neet vaan plan um get aon de pries te doen. Ze hope tot ’t neet zoe lang geit dore en tot binnekort de sjepe weer door de Straot vaan Hormuz mage goon vare en tot daan weer genóg olie euze kant op kump. De Iraniërs höbbe evels aander ideeje, dink iech, en die speule noe e bitteke kat en moes mèt dee menier in ’t Witte Hoes. Dee reup noe ederen daag get aanders en aoventouw höbste ’t geveul tot dee menier zelf in d’n olie is. Veur eder vaan us is ’t noe mer aofwachte wat en wienie geit gebäöre um weer in ’t reine mèt ein te koume. Dus veurluipeg is de benzien deur, hiel deur!
’t Ierste boe eine vaan us aon dink is um d’n oto te laote stoon en zeker minder te gebruke. Op die meminte kumpste eigelek d’rachter wie dèks iemes vaan us d’n oto pak um gaw get te hole, te bringe of eve te doen. Veer kinne eigelek neet mie zoonder deen oto. ’t Is hiel dèks ’n groete kemissiekalbas. Kemissies nao hoes touw drage is jummers kepotmekerij en dat zien veer neet mie geweend. “Dao höbbe veer d’n oto toch veur”, zal mennegein riddenere.
Aofstande zien door d’n oto te verwaarloeze gewoorde. Euver 5 kilometer löp iemes ’n oor in gewoen tempo meh mèt d’n oto stèlt dat niks mie veur. 5 kilometer zien e paar menute gewoorde.
Wat noe gedoon? In ’t berghok steit d’n èllentrike fiets te wachte um gebruuk te weure meh es veer daan nao de loch loere daan is ’t weer aoventouw neet te vertrouwe. Donderdagmiddag gaof ’t nog rege, snie en hagel en dao heet me toch geine zin in. Dus toch mer d’n oto!
D’n touwstand in de wereld heet us de lèste jaore dèkser d’n aosem doen inhawwe. Welke kant geit ’t op en wat kinne veer zelf doen um dinger te veurkoume? De discussie geit noe weer opnui euver kernenergie zoetot veer qua energie op eige bein kinne stoon en neet vaan aander len aofhaankelek zien. Daan kinne veer de koumende jaore d’n ellentrikke oto en fiets oplaoje mèt d’n energie dee daan in de naoventrint gemaak weurt of op eus eige daak via de zonnepanele geproduceerd weurt. Daan höbbe veer d’n olie neet mie nudeg.
