Inhoudsopgave
Iech weet ech neet wat iech devaan moot dinke meh opins waors d’r dat look in de grond. De steis daan eve raar te loere en metein beginste te prakkezere welk bies dat look gemaak moot höbbe. Daoneve kump netuurlek de vraog metein opzètte: “wat moot iech noe weier doen?”. Umtot’ste neet wèts welk bies dit look gemaak heet, wètste ouch neet of ste beter vaan dat bies aof kins koume of tot’ste ’t bies e good oonderkoume moos gunne en ’t look moos laote boe ’t is.
Iech vermoed tot dat bies in de nach op feziet kump want euverdaag höb iech nog geinen eine kier get zien gebäöre in en roond dat look. Um noe ’n nach op te blieve um kinnis te make mèt dat bies, dat geit miech ouch noe weer te wied. Welliech es iech op d’n oetkiek zouw ligke zouw dat bies neet in de naoventrint wèlle koume en zit’ste de ganse nach op wijl niks gebäörd. Geer snap hopelek in welk dilemma iech terech bin gekoume door dat verrekde look.
Aandere vraoge stèlle euver eus look heet wieneg zin. “Dat is e groet look!” en “boevaan zouw dat look zien?”, waore de constateringe die iechzelf ouch al had getrokke dus dao sjut eine vaan us geine mieter mèt op.
Internet gief ouch al gein antwoord. Es zeukopdrach opgeve “een gat van een dier” liet versjèllende loker zien meh gei look wat op ’t look vaan us liekend. Iech oontdèkke wel tot zoe look ouch vaan e stekelverke kint zien en dat zouw iech persoenelek erg leuk vinde. Iech vin stekelverkes bès wel aordege bieste. Dus e stekelverke zouw welkom zien.
Allewijl zeet me tot chatgpt euveral ’n antwoord op wèt te geve. Vergeet dat mer. Ouch chatgpt wèt ziech geine raod mèt ’t look dat veer indirek neve euze caravan höbbe. Daorum höb iech miech mer ‘ns achter ’t toetsebord gezat en dit verhaol gesjreve en ‘ne foto vaan eus look daobij gedoon. Iech dach daobij: “Welliech tot in Mestreech iemes roond löp dee internet en chatgpt te slum aof is en indirek te vertèlle wèt wee de beisteleken eigeneer vaan dit bezunder look zouw kinne zien”. Veur ’n aontal lui is dit look noe e groet mysterie en mysteries zien d’r noe einmaol um opgelos te weure, neettaan?
Jan Janssen
