Inhoudsopgave
Iech laos e stök euver ’t gebruuk vaan ’t dialek. In de kinderopvaangk weurt Nederlands gesproke tege de kinder en de kinder numme dat euver mèt es gevolg tot hielväöl kinder ’t dialek, de eige moojertaol, neet mie mechteg zien. Veur ’t gemaak goon pappa en mamma daan ouch mer Nederlands spreke en ’t dialek sjuif nao d’n achtergrond.
Dat kump zeet me, umtot de leiding vaan de kinderopvaangk bang is, tot es me dialek sprik tege de kinder, en de inspectie kump tot me daan op z’ne kop krijg umtot Nederlands geëis zouw weure. De vraog is noe: wienie is dialek gepas en oongepas? Kinder twietaoleg opveuje maak hun taolgeveuleger en dat heet, mèt ’t liere vaan aander taole, allein mer veurdeil. Me liert gawwer Frans, Duits en Ingels umtot me al aander klaanke kint. ’t Mestreechs heet jummers zeve extra klaanke die ’t Nederlands neet heet.
Bij de bezinningswandelinge veur de Heilegdomsvaart kaom ’t Mestreechs miech persoenelek weer good vaan pas. Es me ’t heet euver brögke bouwe en wie lui dat in ’t daogeleks leve kinne touwpasse daan kump dien moojertaol dao perfek bij vaan pas. Me kint daan mie geveul d’rin lègke. ’t Nederlands niks tenao meh ’t Mestreechs pas daan beter. Es me daan mèt ‘n gróp bij Slevrouw steit en me vertèlt daan ’t veerske vaan Harie Loontjens zaoleger: “Laot miech oonder eure mantel kroepe, wie e keend bij meer en mer stèllekes dao zitte op mien kneeje, beienteer. Zèt eur keend – iech höb väöl te vraoge – effekes daan bij miech neer” daan kump dat rech oet ’t hart. Me zuut daan aon de lui die mèt zien gegaange tot hun dat aonsprik.
Wie iech daonao mèt lui oet ’t ganse land roondtrok door de stad klónk datzelfde veerske gans aanders wijl de kemissie ’t zelfde is.
Aoventouw zien de vertaolinge vaan kinder, Mestreech – Nederlands of aanders um, ouch hartstikke leuk um nao te luustere. Pak ’t Mestreechs woord “teleur” en ’t Nederlandse woord “teleur”. Es ‘ne mins vaan bove de Moerdijk zeet: “stel me niet teleur” daan heet heer ’t euver gans get aanders es “sjöp mer e paar eerappele op dienen teleur”. Taol blijf leuk um dao mèt te speule en dat wèlle veer eus kinder toch neet oonthawwe. ’t Is good te hure tot väöl jäög op d’n tèllefoon in ’t Mestreechs mètein ligk te chatte. Dat is e good teike um mèt aof te slete.
Jan Janssen
