Inhoudsopgave
De lèste weke is haos ederein in de naoventrint bezig mèt de aonstaonde gemeinteraodverkezinge. Hiel väöl, te väöl, partije perbere de koumende veer jaor in de gemeinteraod te koume. Nao 18 miert zalle veer zien wat ’t opgelieverd heet en wee de koumenden tied geit bepaole wat in Mestreech geit gebäöre. D’r is genóg te doen, dat is ’n zaak die is zeker.
Belaankrieker is evels de situatie in de wereld. De lèste jaore steke zakes de kop op boe ederein oongerös vaan weurt. Wat gebäört allemaol in Oekraïne en veurwat sjeit dee Rus neet oet mèt dat land kepot te make?
Wat gebäörd op dit memint allemaol in ’t Midde Ooste? Iran en Libanon weure gebombardeerd. De Gaza-strook ligk in puin. Doezende lui zien op de vlöch en doezende aandere zitte vas op ’n plaots boe ze noe neet wèlle zien. De wereld is op hol geslage.
Amerika heet Cuba de wach aongezag. In Venezuela höbbe ze de president oet ze bèd gehaold en noe in Amerika vasgezat. Raar allemaol. Wat bringk dao de touwkoms?
Boe moot ’t nao touw mèt de wereld? Boe moot ’t nao touw mèt eus Mestreech is daan mer ’n hiel klein probleem in vergelieking mèt de groete wereld probleme.
Aofgeloupe zoondag leet d’n deke, John Dautzenberg, wete tijdens de hoegmès tot d’r e nui initiatief is in de Sintervaos. Op bepaolde tije stèlt me de basiliek ope um binne te loupe en tot me ziech daan eve kint bezinne op ’t leve in alle stèlte. Dat hoof neet direk um te beie te zien, gewoen eve e rösmemint te pakke. “Num eventueel e book mèt um dat in stèlte te leze”, waore de wäörd vaan d’n deke. Lui höbbe rös nudeg en de kèrk kin die rös beeje. Wat heer ouch nog leet wete waors ’t volgende: “Laot alle electronische zake thoes, geinen tèllefoon, geine epaid, geine labtop. Num dat allemaol neet mèt en kom hei in de basiliek die rös die veer allemaol misse weer zeuke. Bring opnui rös in de leve.”
Veer höbben ’t allemaol drök en prakkezere väöl. Ederen daag brink d’n tèllevisie us de oonrös vaan de ganse wereld in de hoeskamer en oonbewus bringk us dat aon ’t prakkezere euver de koumenden tied en wie ’t weier moot. De rös die noe gebooje weurt kint veur väöl lui vaan belang zien um weer eve tot d’n eige te koume.
Eigelek mote veer bij de verkezinge dao ouch ‘ns nao loere. Welke partij bringk rös de koumenden tied. Mote veer de koumende jaore zoe nudeg op de barricade in Mestreech of kinne veer ouch ‘ns in alle rös zake beredenere en keze veur sjoen oplossinge boe veer allemaol vaan kinne profitere.
