Inhoudsopgave
Höb geer ’t ouch geleze: frisdraank is neet good. De krijgs hoege blooddrök devaan en welliech e begin vaan diabetes 2. ’t Is beter um gewoen fruit te ete en neet fruit dat aongelenk is gewoorde mèt water en koolzuur. Dat beteikent nog al get zouw iech dinke.
Es iech in de supermerret mien kemissies gaon doen daan loup iech, eins in wat veur ‘ne supermerret ouch, tege ‘ne moer aon vaan limmenaad in alle soorte en smake. Wie ’t vaan de zomer zoe heit waors woort door hiel get lui limmenaad gedronke um d’n doors te lesse en ‘ne frisse smaak in de moond te kriege. En dat bliek noe allemaol verkierd te zien.
Es veer vreuger op sjaolreiske ginge had haos eder keend ’n fles limmenaad bij ziech. Oonderein woort de loef aof gestoke wee de bèste fles bij ziech had. ’t Sjoenste waore de beugelflesse vaan Exota. Die kóste weer slete en dao kóste daan ‘ne ganse daag mèt doen. Of dat gebäörde waors vers twie, meh ’t kós!
Veer ginge mèt de boot nao Stein en daan weier te voot nao ’t Steinderbos boe ‘ne sjieke speultuin laog en nog ligk. Dao woort ‘ne gansen daag geravot en tege vief oor kaom de bös um us trök nao Mestreech te bringe. Daan hadde veer dus ‘ne liter limmenaad of mie op en ‘ne piel boterhamme mèt druugweurs en kies. Daoneve ‘ne Mars en ’n tuut chips. En dat bliek noe allemaol verkierd te zien, zeker dee limmenaad. Noe bliek dus weer ‘ns dudelek tot e zäötsje vaan ’t verkierde al vreug gezejd is gewoorde. Wat noe gedoon?
Welliech is mennegein, zeker vaan de manslui en ouch e deil vaan de meidskes, nao de limmenaad-periode euvergestap op beer drinke. Noe wouw iech uuch de volgende vraog veurlègke: Is dat ‘ne gooje zat vaan die beerdrinkers of neet?
Allewijl huurt me tot water ouch neet hielemaol te vertrouwe is want door gebruuk vaan gif in de landbouw kump hiel get verkierts in ’t drinkwater terech. Get vaan die verkierde stoffe kinne veer d’roet hole meh neet alles. Vaan die circa 650 verkierde stoffe kinne veer ‘rs mer e beperk aontal. Vreuger, in begin 1900, waors water gaaroet neet vertrouwe en droonk me beer umtot dat gekook waors gewoorde en daodoor zuverder waors es water.
Noe kump de vraog: Es dat zoe is tot water en limmenaad neet mie te vertrouwe zien, is de beerdrinker daan toch de slumste drinker vaan us allemaol?
Dus mèt de vastelaovend in ’t veuroetziech zien veer in Mestreech good bezeg en kinne veer mèt gerös hart zinge: Boe de brouwer is hoof de bekker neet te zien.
Jan Janssen
