Inhoudsopgave
Aofgeloupe week höbbe ’n aontal studente vaan de kunsacademie, de toneelacademie en fashion clash ziech laote informere euver de koumende Heiligdomsvaart. Aondachteg höbbe ze geluusterd nao drei verhaole euver historie, rillekwieje en tradities roond dit bezunder gebäöre in eus stad.
’t Oongeluiveleke is toch ’t feit tot iemes dee hei zoe’n 1700 jaor geleie heet roondgeloupe en ’t verhaol vaan Slivvenier heet vertèlt nao al die jaore nog zoeväöl lui op de bein krijg. Dat heet Sintervaos ziech noets zelf kinne bedinke, meh ’t feit is d’r.
Noe al zien hiel get lui via vereiniginge, clubkes, hermenieje en famfares ziech aon ‘t veurbereie op dit gebäöre. Astrein trèkke de ommegange door de straote vaan Mestreech en loert ederein ziech de ouge oet wie de gróppe d’r weer bezunder en sjiek oetzien. Väöl vrijwilligersore achter de nejmachines höbbe dat daan veurein gekrege. Get wat veer us neet ummer realisere.
Door de veriering vaan euze stadspetroen door de iewe heer heet de Sintervaoskèrk hiel get kèrksjatte gekrege vaan verierders vaan deen heilege. In 1983 heet rezjiseur Huub Noten zaoleger us die rieke historie al perbere dudelek te make. Mèt ’t speul “’het Gouden Huis” wees Huub us op belaankrieke gebäörtenisse in de Sintervaos.
Pieke Dassen droog destijds, oonder e baldakijn, ’t byzantijns kruus boe einentwinteg stökskes vaan ’t kruushout in zitte oonder prachtege meziek euver de Vriethof. Dat kruus heet de Sintervaos oets gekrege vaan Godfried van Bouillon (de besjermer vaan ’t Heileg Graaf in Jeruzalem). De Sint Servaos heet daodoor ein vaan de groetste rillekwieje vaan ’t kruus vaan Slivvenier.
Voetballer Johan Dijkstra en de toenmaolege miss Limburg mochte de kiezerleke broelof vaan Kiezer Otto de Veerde en zien broed Maria van Brabant oetbeelde die in 1214 in de Sintervaos trouwde. De Sintervaoskèrk waors en is ’n zier belaankrieke bedevaartskèrk in Europa. Daorum wow de kiezer hei trouwe.
’n Bezunder plaots waors netuurlek weggelag veur ’t binnebringe vaan ’t borsbeeld vaan Sintervaos. Op spesjaol verzeuk vaan de keuning vaan Spaanje heet d’n Hertog vaan Parma, Alexander Farnese, ’t borsbeeld dat door zien soldaote in 1579 waors verinneweerd, laote herstèlle en dat beeld drage veer nog ummer gruuts roond door Mestreech.
’t Hoegtepunt waors de Noedkis die woort binnegedrage en wie ’t publiek op de tribune ging stoon en aongedoon vaan emotie luusterde nao de sjoene meziek waors dat ’t hoegtepunt vaan ’t speul dat Huub had bedach.
Binnekort geit dat weer gebäöre. Hoonderde lui trekke door de straote en tuine ederein de rillekwieje die aon eus stadspetroen, euze Sint Servaos, door de jaore heer zien gesjonke.
Jan Janssen
