Inhoudsopgave
Sjijns hadde ze thoes beslote um mèt dit weer neet zelf te koke. Te heit en geinen enerzjie um in de ketele te reure. Heer zaot dus mèt ‘n oetgebreid breefke aon bestellinge bij de frituur. Umtot heer verwachde tot ’t e tiedsje ging dore had heer ziech zelf alvas getrakteerd op e blikske beer. ’t Wachte veel daodoor mèt. Aoventouw mooste d’n eige verwene had heer sjijns gedach.
Nao de bestelling had heer keumenterend plaots genome op ’n krök bij de roet. Die bezunder temperatuur had heer ziechzelf noets gegund, meh ’t weer krijgste gratis en veur niks. Ze figuur vroog neet um al te väöl inspanning. Zonder alle die zon had heer ’t al meujelek genóg. Ziechbaar had heer ’n veurleefde veur beer en die veurleefde had door de jaore heer ziene väörgievel in beslaag genome.
Sjijns waors zien sterrebeeld “schorpioen” want dat stoont op zien linker bein te leze. Dat waors neet ’t einigste pleetsje dat op zien lief te zien waors. Zien vriendin of zien dochter moot de sjoene naom “Joyce” höbbe want dee blonk op zienen erm en daoneve get aofbeeldinge die häöm welliech mie wiste te vertèlle es aander lui.
Aon zien veuj, oonder de korte brook, droog heer crocs die oets hadde geholpe um get liech blouw te sjèldere. Die spetters contrasteerde nogal mèt de raar greun kleur vaan de crocse zelf. Twie dikke veuj staoke in die dinger en allein de hakke raakde noe de grond.
Oet alles bleek tot de gebruker/eigeneer meuj waors en ’t werm weer kotsmeuj waors.
Opnui, nao ’n slók beer, beloerde heer ’t kemissiebreefke weer. Mèt ziene vinger ging heer langs de bestèlling en opins vroog heer: “Iech höb toch ‘ne gehakbal bestèld?” De vrouw vaan de frituurbaas gaof indirek es antwoord tot heer inderdaod ‘ne gehakbal bestèld had. Ziechbaar opgeluch naom heer ‘ne slók beer en beloerde obbenuits ze breefke.
De tuute vaan de frituur woorte stèlaon gevöld mèt frites, frikandelle special en neet-special, bereklawwe, spoetniks, tirolers en gaank zoemer weier en ’n extra blikske beer. ’t Ierste blikske beer woort stèlaon leger, dat waors te hure aon ’t geluid bij ’t neerzètte vaan ’t blikske. Oetindelek waors de ganse bestelling klaor. De frituurbaas waarsjouwde häöm en langsem kaom heer los vaan de krök. Boete wachte de scooter dee neet direk wouw starte. In e raar soort Frans woort de scooter touwgesproke en sjijns holp dat want heer leet preutelend wete tot heer in beweging wouw koume.
Mèt twie tuute fituurgood op de voteplaank tösse de crocse vertrok de maan nao de wachtende femilie.
’n Hittegolf kinste normaal gesproke veule meh dee mins had de hittegolf ouch e geziech gegeve.
Jan Janssen
