Inhoudsopgave
Zoe gaw es de vekansie begint kump ouch de vraog of veer weer ‘ns wèlle goon kaarte. Dat is eve e dingk. Neet tot kaarte neet leuk is meh volges welke regels goon veer kaarte, dat is de groete vraog. ’t Bars vaan de versjèllende regels en regelkes. Veer speule naomelek ’t liefste Amerikaons Jokere. Veurwat of dat Amerikaons hèt weet iech neet. Zouw dat koume door ’t feit tot de regels ummertouw aanders zien? Zoe bitteke wie de regels vaan Trump want die zien ouch ummertouw aanders.
’t Begint al of me bij de ierste runde maag oplègke. Bij d’n eine maag dat wel bij d’n aandere neet. Wat maag me oplègke? Allein wat gevraog is, weurt daan gezag. Dus drei gelieke, drei achterein, veer gelieke, veer achterein, vijf en zès achterein en daan d’n oet.
D’r zien femilies die zelfs tot zeve achterein goon. Dat vin iech de lui ’t vel aof doen. Dat is geisteleken terror.
Bij Amerikaons Jokere kinne kaarte gekoch weure. Ouch dao versjèlt d’n aonpak vaan femilie bij femilie. ’t Sjoenste is es me de kaarte die aofgegoejd is bij opbod kint koupe. Ganse gevechte weure gevochte um de betreffende kaart in han te kriege. Daodoor weurt de pot behuurlek gespek en dee oetindelek ’t pötsje wint lach ziech kepot. Bij inkele kaarters kint me daan de ingebouwde en geërfde zuinigheid oontdèkke die deep in de gene zit. Op gegeve memint hawwe dat soort lui op mèt beeje umtot ze dat mèt hun eige neet kinne verantwoorde. Gespeuld weurt trouwens mèt aw cente boe Wilhelmina, Juliana en Beatrix nog opstoon. Meh cent blieve cent veur dat soort lui.
D’r zien ‘rs ouch die ’t koupe opsjrieve en op ’t ind weurt per gekochde kaart vief punte bijgesjreve bij ’t aontaol behaolde negatief punte. Dat kint diech behuurlek de nek breke.
D’r zien ouch femilies boe de pot behawwe blijf en boe me vaan d’n opbringks eine kier per jaor oet geit ete.
Kaarte blijf de lui bezeg hawwe en is get veur ‘nen ammesanten aovend boe chagrijn bij kint koume kieke meh ouch weer gaw wegtrek es ’t volgende pötsje gewonne weurt.
Es me verlore heet en me zit nog mèt ‘ne joker op z’n han daan kin dat ouch leie tot ’n ganse discussie. Wieväöl punte moot d’n erme kloet dee dat is euverkoume daan bijtèlle? Gemeinelek heet me ’t daan euver vieftien punte meh dao zien dus femilies die d’n ermen hals viefentwinteg punte laote bijsjrieve. Oonminselek! Dat deit me neet.
Moch geer binnekort goon kaarte daan wins iech uuch väöl wiesheid en gelök. Welke regels en regelkes maag geer zelf bepaole. Iech wins uuch ‘ne gezèllegen aovend en de nudege jokers.
Jan Janssen
