Inhoudsopgave
Veer, mien vrouw en iech, waore tot de conclusie gekoume tot iech ’n nui brook nudeg had die bij e bepaold jeske zouw mote passe. Veer dus d’n oto in um nao Heerle te rije boe mien vrouw dach ’n passende brook te vinde.
Binne ’n haaf oor biste in Heerle boe’ste hiel gemekelek d’ne oto kwiet weurs. QPark kint oondertösse mienen oto en die liet miech daan binne door vlot de slaagboum ope te doen. In de garaasj in Heerle steit haos geinen oto dus de hoofs neet te zeuke en kins dien “iezer” (koosnaom veur mienen oto) gemekelek en veileg achterlaote.
Via de Promenade löp me Heerle in en al gaw stoonte veer op de aofdeiling “Hiere” boe stapels breuk laoge. Op miene leeftied zeuk me ummer nao get wat ‘sportief en toch gekleid’ oetzuut um zoe de leeftied en de grijs haore in verlegenheid te bringe. ’t Woorte jeans.
Wat de lèsten tied opvèlt is ’t feit tot me bij ’t passe de sjeun moot oetdoen umtot de piepe vaan de breuk zoe smal zien. In de carnavalskis höb iech ’n brook boe dat hielemaol neet hoof. Die brook höb iech oets gekoch bij Pie in de Breistraot wie veer in de jaore tacheteg vaan de veurege iew de musical ‘Mie Fien Mamzèlke’ späölde en iech ‘nen inwoener vaan Heerle mós speule. Die brook had destijds al e gans leve gehad en via Pie kaom die bij miech terech. ’t Moot ‘ne flinke mins gewees zien dee d’n ierste eigeneer en völler vaan die brook. Mäötsje XXXXL meh heerlek um te drage. Aon de zijkant heet de brook knuip um de brook get in te numme meh zelfs dat hölp geine mieter bij miech. Ze is neet kepot te kriege en weurt nog eder jaor mèt e stèl höllepe good op z’n plaots gehawwe.
Zoe’n breuk make ze allewijl neet mie en wat nog erger is, ze perbere op allerhande menere te bespaore door dinger smaller en kleiner te make aon de breuk vaan allewijl. Iech mós opnui constatere tot de rits in de gölp weer kleiner, dus korter is gewoorde. Este hoege noed höbs mooste diech allewijl haaf oetdoen en dat is bij die brook die iech uuch besjreef beslis neet ’t geval. Trouwens die brook heet knuip bij de gölp en e pienlek ‘bedriefsoongeval’ kint dus neet veurkoume.
Iech höb ’n brook gevoonde. ’t Waors de twiede die iech pasde en dus had iech gei klaoge vaan brook in en brook oet. Nao de economie vaan Heerle weer geholpe te höbbe zien veer trök gerije nao Mestreech. Mien vrouw had oondertösse nog e leuk bluuske gekoch en dus waore veer contente lui die obbenuits ‘sportief meh gekleid’ door Mestreech zalle flanere.
