Inhoudsopgave
’t Is door de rege en de störm opins naojaor aon ’t weure. Langen tied höbbe veer dat kinne oetstèlle meh noe, dink iech, mote veer d’raon geluive. De temperatuur is wel nog good en dat is good veur de gaasrekening.
Ouch de stad begint ziech stèllekesaon veur te bereie op de wintersen tied dee oongetwiefeld zal koume. Euveral weure al lempkes opgehaange en begint Mestreech weer te straole in ’t leech vaan doezende lempkes. Mestreech is astrein weer die trekplaoster boe hoonderde toeriste op aof koume.
Wat allewijl gecombineerd weurt mèt ’t naojaor is ’t feit tot veer sins ’n aontal jaore Hallowien goon viere. Get wat oet Amerika sjijns is koume euverwejje. ’t Kin neet akeleg genóg zien. De winkels ligke vol mèt zwik um aon dat gebäöre mèt te doen.
Vreuger ging de jäög op zeuk nao krote um die oet te steke en dao ’n lantere vaan te make. Die kroot kraog ouge, neus en moond en in ’t binnenste kaom ‘ne bougie te branne. Noe zien de krote vervaange door pompoene en weure dao de mies artistieke creaties mèt gemaak. Door de introductie vaan ledleech is ouch väöl mie meugelek gewoorde.
Vaan oersprunk is Halloween eigelek e Keltisch fies dat vreuger in Ierland, Sjotland en in deile vaan Ingeland woort gevierd. Op 31 oktober vierde lui d’n euvergaank vaan d’n oogstied nao d’n duustere wintersen tied. Lui meinde daan tot de wereld vaan de levende en ’t riek vaan de doeje korter es aanders bijein kaome. Geiste kóste daan trökkiere op eerd. De koej geiste evels liever neet en daorum staoke ze vuure aon en zatte ze ziech maskes op um door de verkierde geiste neet herkind te weure.
Veer wete oondertösse tot hiel get lui oet Ierland en Sjotland nao Amerika getrokke zien um dao e beter leve op te bouwe. De tradities höbbe ze mètgenome en blieve viere. Oetindelek is dat ind jaore 90 en begin 2000 euvergewejd nao Europa wijl veer evels via de kèrk 1 en 2 november, Allerheilege en Allerziele vierde. Die zien gebleve en veer höbbe Halloween extra debij gekrege. Hajd uuch dus vas es astrein thoes de deurbel geit en ’n aontal spoke, groete en ganse kleine bij uuch op de stóp stoon.
Jan Janssen
