Inhoudsopgave
Veur de zoeväölste kier op ‘nen daag kump de boot vaan Stiphout langs gevare um eve later aon te lègke op Sint Pieter. En ummertouw zit de boot vol mèt lui die genete vaan ’t oetziech, ’t greun oetziech vaan Sint Pietersberg en aon d’n aandere kant Heugem en Pietersplas. De luikes die hei op vekansie koume mote toch ’t geveul höbbe tot ze in ’n aander land es Nederlnd zien beland. Hei gief ’t get wat zij neet höbbe namelek “berge”. Es Mestreechteneer zien veer gruuts op die dinger en veer neume ze ouch allemaol veur ’t gemaak “berge”. Veer höbbe de Sint Pietersberg, de Cannerberg, de Louwberg, de Rasberg, de Kruisberg, maar ook Pottenberg, Caberg en Malberg en iech zouw haos de Kakeberg vergete.
Es inwoeners vaan dees stad vinde veer dinger die veer höbbe gans normaal meh is dat ouch normaal? Nein, veer leve in e gans aander stökske Nederland es boe de res vaan ’t land woent. De res vaan Nederland is zoe plat wie ‘ne cent.
Door die ‘berge’ kinne veer us de lèste jaore ouch aanders profilere es de res vaan dit land. Iech zeen ummer mie wiengaarde oontstoon en daodoor krijg de umgeving in ’t zuije ouch ’n ganse aander oetstraoling. Wiengaarde zien strak qua oetziech. Alle wienstekke stoon sjoen in ’t gelid en geve e geliekmaoteg beeld. Dat straolt get zuiderleks oet en det de lui dinke aon Fraankriek of pläötskes langs de Moezel of de Rien.
Wijl iech zoe zit te mijmere sjink iech miech oondertösse e gleeske wien in en geneet vaan de vrijheid die vekansie hèt. Iech höb oetziech op Sint Pietersberg en huur euver de Maos de boot vaan Stiphout weer aonkoume mèt opnui ‘ne gróp lui die koume genete vaan de greun umgeving vaan eus stad. In gedachte zeen iech ze kömmenterend de berg op kretse um eve later neer te ploffe op ’t terras vaan Boetegood Slavante mèt oetziech op de Maos en de plezeerbeutsjes op de Pietersplas. Wie bezunder is dat en veer höbbe dat oonder handbereik.
Venaovend späölt André weer op de Vriethof en zitte doezende lui te genete vaan ziene meziek en die unieke plaots, eus Vriethof, in eus bezunder plaots op eerd. ’t Klink welliech get sjovinistisch meh mage veer dat in godsnaom zien. In 1830 is e prima besluut genome door Mestreech bij Nederland te veuge. Merci daoveur menier Dibbets!
Jan Janssen
