Inhoudsopgave
Aofgeloupe maondag waors iech in de Muziekgieterij um te goon loere en luustere nao de kinder vaan de basissjaole de Vlinderboom en Aloysius die dao meziek ginge make. Hiel väöl awwers völde de groete zaol en waore in aofwachting wat de kinder ginge doen en wie dat zouw klinke.
Op de bühne stoonte keyboards, e drumstèl en ’n raffel gitare. Vol verwachting vaan wat us te wachte stoont loerde ederein nao de bühne.
De kinder kaome de bühne op en naome bezit vaan de instruminte esof dat de gewoenste zaak vaan de wereld waors. Same mèt de lui vaan e poporkès hadde ze in 10 weke tied instruminte liere bespeule en leedsjes liere make en prizzentere. ’t Waors zier vermakelek en ’t kloonk good. Sjiek um de kinder te zien genete vaan wat ze in 10 weke tied hadde gelierd. En de awwers waore netuurlek hartstikke gruuts.
Gans gruuts woort op de instruminte meziek gemaak meh netuurlek, wie dat ouch bij de echte orkèste ’t geval is, de zengers en zangeresse vele ’t mieste op. Mèt passie woort gezonge en woorte, väöl Ingelse tekste, mèt verve gebrach door de aspirant artieste.
’t Orkeske vaan mien kleinzoon, 5 jonges, hadde netuurlek e leedsje gesjreve euver voetballe. Stoer! Welliech is bij get kinder ‘ne nuien hobby gebore.
Euver meziek gesproke!
De aofgeloupe daog waore zeve conzèrs te beluustere op de Vriethof in ’t kader vaan de Heiligdomsvaart. Aon de good gevölde tribuun ederen aovend waors aof te leze tot hiel väöl lui dat bezunder sjiek vinde en genete vaan datginnige wat geprizzenteerd weurt. De hermenieje en famfares hadde e good program samegestèld um in ’n oor tied te laote hure wat ze in hoes höbbe.
Hiel bezunder waors ’t conzèr vaan Concordia Mestreech. ’n Famfaar die op sterve nao doed waors heet ziech bijeingeraap en mèt väöl enthousiasme woort ’n ammesant programma gebrach. Iech mós eve aon de Feniks dinke. Eve mer want de meziek waors te good um te lang aon dee vuurvogel te blieve dinke. Opvallend waors de constatering tot ederein leet wete aon dit soort prizzentaties mie behoofte te höbbe. De muzikante wèlle gere laote hure wat ze kinne.
Welliech um in ’t Mestreech jaor, koumend jaor, ’n reeks conzèrs in te planne zoetot Mestreech kint genete vaan de korpse die veer höbbe en wat ’n hiel riekdom veur eus stad Mestreech is. Get um te hoejere!
Jan Janssen
