Inhoudsopgave
Roond d’n tied vaan ’t preuvenemint geit Mestreech gemeinelek op zeuk nao kandidaote veur ’t prinssjap. Ederein is daan trök vaan vekansie, is hiel erg of e bitteke broen gewoorde en vint op dat memint Mestreech toch sjoener, gezèlleger en beter es de plek boe me op vekansie is gewees. Alle sjovisniste zien daan weer trök op ’t nès en dat is um Mestreechter zakes te regele ’t mies oetgesproke memint. Mèt die conclusie kint geer ’t allein mer eins zien, neettaan?
De lui vaan “Revue aon de Maos” höbbe aander kopzörg. Die zien op zeuk nao oonzin, quatsch en sjele zeiver. Verleie jaor vertèlde vrund Frank Steijns e kort möpke euver iemes dee ’n kojl wouw verkoupe. Dat möpke bleef haange en is e geweldeg verhaol gewoorde. Puren oonzin! Nao dat soort oonzin zien veer noe obbenuits op zeuk. Dus es geer quatsch of sjele zeiver wèt daan zeet geer vaan harte welkom.
Noe zalt geer welliech zègke: “Janssen, de zits in de polletiek dus de huurs genóg sjele zeiver. Wat kinne veer dao nog aon touwveuge?” Meh dat ligk toch aanders. Ouch in de polltiek weure kojle gegraove en weurt geperbeerd die kojle te verkoupe. Vendaog nog perbeerde iemes mèt e laank verhaol op facebook zien kojl aon de maan te bringe. Iech lach miech daan kepot. Dat soort oonzin is ’t voor veur d’n toeker dee daomèt aon de slaag moot.
Iech bin op AI goon zeuke wat oonzin eigelek inhèlt en daan krijg me ’n ganse filosofische verhandeling. Oonzin, zeet AI, is de rommel dee in ’t deep verstand vaan de mins verborge zit. ’t Is goudstof in de minsehand. Welliech ’t lèste leech dat in ’t minselek brein brand. Dus oonzin is neet zoemer get, ’t is niks mèt get d’rum heer.
In ’t daogeleks leve gebäöre dinger die komisch / hilarisch zien en d’n daogeleksen tuiel eve doorbreke. Dat zien heerleke dinger um oet te vergrute. Gaot ‘ns deep graove in eur brein en laot us wete es get vaan dat goudstof bij uuch bove kump. Veer zien hartstikke benuid naor de deepste reursels in eur zielemint.
Ein vaan de eleminte vaan vastelaovend is ’t gegeve um de mins de spiegel veur te hawwe en häöm te confrontere mèt zien eige stom foute, oonbezonne opmèrkinge en/of vermeinde intelligente oetlaotinge die ’t IQ vaan de mins in de min laote sjete.
Eder handreiking is welkom. Bij veurbaat zien veer uuch ieweg daankbaar en heet eur bijdrage welliech nao fibberwarie 2026 historische weerde. Wee zal ’t zègke.
Jan Janssen
