Inhoudsopgave
“Mag ik nu ook even uitpraten!’’ is get wat me de lèste daog hiel dèks op d’n tèllevisie huurt. De politici laote ziech oonderein amper oetspreke. D’n eine wèt ’t beter of dink ’t beter te wete es d’n aandere. D’n eine mojlt euver d’n aander heer en of heer daobij mètkrijg wat d’n aandere zeet, is nog mer gans de vraog. Luustere is lèsteg. Luustere is ’n kuns. Lui die good luustere kinne bij aandere (de kieker of de luustereer) euverkoume esof ze neet mètdoen of ’t antwoord neet wete. Me moot dus in de polletiek snel kinne sjakele en vlot kinne mojle um d’n indrök te geve tot me bij de pinke is. Niks is minder woer. Vlotte praoters kinne diech ouch vlot get wies make.
“Wat u nu zegt klopt niet!” is ouch zoegèt wat gerope weurt. Daobij liet me blieke, door mèt ’t gans lief nein te sjöddele tot deen aandere ’t gans verkierd zuut of verkierd heet. De zakes boe ’t euver geit zien dèks zoe complex tot me neet tèks en oetlègk krijg wat noe wel of neet ’t zjuste is. D’n tied oontbrik en dus blijf die opmerking haange. “Het klopt niet” blijf dus haange en blijf ouch aon deginnige plakke dee dat verwied kraog. Mesjiens had heer zjus wel geliek meh wie kom iech dat es kezer te wete. Boe kin iech dat leze in e pagina-dik partijprogram?
“U liegt!” höb iech ouch al dèkser gehuurd. Dat is ’n behuurleke besjöldeging en daomèt steit me deen aandere indirek op zien ziel. Lege is get wat veer eus kinder vaan jongs aof aon liere tot dat hartstikke verkierd is. Lege maag noets. Dus es iemes besjöldeg weurt vaan lege is dat ’n groete, zwoer besjöldeging. ‘ne Roeje kop kriege zouw dao bij kinne hure, meh dat zuut me zelde of noets bij politici.
Langsem kump ’t bezef tot ’t aanders moot en tot veer weer nao luustere, bespreke en debatere touw mote. Neet nao besjöldege en zeker neet nao sjriewe en oonfetsoen. Veur de kezer blijf ’t meujelek um te oontdèkke wee noe persijs geliek heet. Ederein struit mèt ciefers, mèt dinger boevaan veer vreuger zagte tot ’t utopieje zien, lochkastiele. En veer zitte achter d’n tèllevisie en mote us dat allemaol aonhure en dao sóp vaan perbere te trekke.
Miene favoriet op dit memint is de maan dee wèlt tot veer weer fetsojndelek mèt ein um mote goon. Zoe zien veer opgegreujd mèt weerdes en norme die oetgoon vaan respek nao de aander lui.
“Geef ‘ns e henneke, spreek mèt twie wäörd, zègks ‘ns daanke mevrouw of menier, spreek neet mèt diene moond vol, laot menier/mevrouw ‘ns oetspreke, iers de groete lui en daan de kinder, haw ’n hand veur diene moond este moos neeste, staank op veur groete lui, etc. etc.”
Zien veer dat vergete??
Populisme heet dèks de euverhand. Meh dinger rope um te rope is weggegoejde enerzjie.
Laote veer hope tot veer in de maond november weer same de gooje kant opgoon en good en veural verstendeg höbbe gekoze. Dao höbbe veer same ’t mieste perfiet vaan.
Jan Janssen
