Inhoudsopgave
Dee mins mèt dat oranje haor in America heet al dekser es eine kier gezag tot Zelensky d’n oorlog begonnen is en es heer dao waors gewees tot dat noets gebäörd waor. Meh Zelensky, Biden en Poetin zien ’t allemaol sjöld. Es iech zoeget lees daan begin iech aon mien eige te twiefele. Bin iech noe gek of is heer gek? ’t Waors toch Poetin dee ze krankzinneg idee tot oetveur heet gebrach en boedoor doezende oonsjöldege lui ’t mèt d’n doed höbbe mote bekoupe. Is noe niemes in staot um dee mins in ’t Witte Hoes dat aon zien verstand te bringe en tot heer compassie moot höbbe mèt de lui oet Oekraïne.
Binnekort viere veer in eus land tot veer 80 jaor geleie bevrijd zien gewoorde door de geallieerde troepe. Hoofzakelek jonges oet Ingeland, America en Canada die hei kaome vechte tege nazi-Duitsland. Väöl jonges höbbe hun leve mote geve um dat te bereike. ’t Kèrkhof in Mergraote is dao e toenbeeld vaan. Eder jaor obbenuits, mèt naome bij dodenherdenking, hawwe haos alle sprekers us veur tot zoeget noets mie maag gebäöre en tot veer in vrei mètein mote leve.
Wie raar is ’t daan es in America door dee mins weurt gerope tot ’t allemaol aanders moot en tot Oekraïne extra moot blooje veur alle geld wat hun riechting is oetgekoume. Geld dat terech door Biden woort gegeve umtot menier Poetin mèt zien kraank idee oorlog waors begonne. Dat maak Oekraïne tot ’n erm land en noe wèlt menier Trump dat land nog ‘ns extra d’n das um doen.
Zeker es 4 en 5 mei neet mie wied eweg zien dinkste dao euver nao. Wee heet zoeväöl invlood op menier Poetin tot dee zien soldaote trök reup en de wereld mèt rös liet. Zien land en zien volk kinne beter alle aondach kriege want heer maak ouch hiel get hoeshawwes in eige land kepot door dee versjrikkeleken oorlog. Hiel get Russische jonges koume neet mie thoes of koume vermink thoes en zien geteikend veur de res vaan hun leve?
Iech hoop tot dinger goon gebäöre in de touwkoms die ’n ind goon make aon dit versjrikkelek gebäöre en tot lui zalle opstoon die ’t beter mèt hun land en hun volk veurhöbbe. Welliech tot ‘ne nuie paus dao ouch invlood op kint oetoefene. God gief ‘t!
Vendaog viere veer Keuningsdaag. Dat is gemeinelek ‘nen daag tot veer allemaol e fiestelek geveul höbbe en eus oonderein traktere op de vrei boevaan veer in eus land, oonder euze keuning, mage genete. Laote veer dao eve bij stèl stoon en laot us nog -tig kier 80 jaor vrijheid dao aon vasknuipe.
Daan veule veer us allemaol de keuning te riek en dat is e geweldeg geveul. Dao kin geinen Trump en zeker geinen Poetin ouch mer ‘t kleinste bitteke aon tippe! Hawt dat veur ouge en alvas ‘ne sjoene keuningsdaag gewins.
Jan Janssen
