Inhoudsopgave
Aofgeloupe zoondag zaote veer e hepke te ete in de Koojstraot. Neve us kaome ’n aontal Belzje dames zitte die de economie vaan Mestreech ins good veuroet hadde geholpe. De ein kalbas kaom neve de aander te stoon. E nui rökske,e nui truike, alles ging euver de taofel en woort oetgebreid bemonsterd en vaan commentaar veurzeen door de aander dames. Tot eus groete verbazing kaome op gegeve ouch e stel keersballe oet de verpakking. Gekoch bij de Bijenkorf. De keersaofdeiling is al ope hoorte veer vaan de dames. Eve mós iech miech achter de oere kretze. 14 september, ezzebleef!! Nog 102 daog veur ’t keerskinneke in ’t kribbeke kump te ligke en ’t jaor heet mer 365 daog. De dames hadde ouch al keerskaarte gekoch.
De lèste jaore höb iech ’t geveul tot es de groete vekansie um is tot daan ouch haos ’t jaor um is. Al weke ierder kóste veer jummers ouch al peperneut koupe die toch eigelek bij de traditie vaan Sinterklaos hure.
De herfsvekansie moot nog koume en welliech tot nog hiel väöl lui nog eve de tössenoet goon. Aoventouw kump ’t geveul bij miech op tot veer ’t jaor gans doorein goeje en de gezellege daog vaan Sinterklaos en Keersemes nao väöre aon ’t hole zien. Veer wèlle de lempkes aon, de bougiekes aon en gezèlleg bij de buis zitte.
De stad is ouch al begonne mèt de straotverseering aon te bringe. Astrein koume de toeriste um eus sjoen stad te bewondere en welliech ‘nen aovend Rieu mèt te beleve. D’n tied geit snel! Soms te snel.
Meh laot miech neet nao aandere wieze want zellevers zien veer al maonde bezeg mèt tekste te sjrieve veur de vastelaovendsrevue. De keertsjes zien haos allemaol verkoch dus hiel väöl lui in Mestreech zitte op de revue te wachte. ’t Veurplezeer is al begonne.
Astrein kump iers ouch nog iers hallowien. In de Groete Staat sjravele die mies akeleke figure euver de groond um uuch astrein, es ’t zoewied is, de stupe op ’t lief te jaoge.
’t Zien wel allemaol fieste um ‘same’ get te oondernumme en dat is bezunder positief aon alle die fieste aon ’t ind vaan ’t jaor. Hallowien weurt in get naobersjappe in eus stad same gevierd. Kinder trekke vaan hoes tot hoes um ziech te laote verrasse. Sjrikke is haos neet mie debij want dao zien ze oondertösse aon geweend geraak.
Meh d’n tied blijf vlot veuroet goon of bin iech d’n einzigste dee dat vint?
Jan Janssen
