Inhoudsopgave
Langsem kröp ’t jaor nao zien ind. Dat veulste aon alles. Ederein perbeert nog gaw get dinger te regele veur tot ‘t 1 jannewarie is. Dat lègk drök op hiel get lui en es me daan aon die lui vreug wie ’t is, daan huurt me: “drök, drök en nog ‘ns drök!”
De bookhawwer wèlt nog gaw de lèste poste inboke zoetot heer e good euverziech heet vaan wie ’t jaor gewees is. Höbbe veer wins gebook of is get gebäörd boedoor ’t nui jaor zörgelek begint?
In de brevebös en via dee mail koume de ierste oetnudeginge veur de nuijaorsrecepties. D’n agenda begint alweer vol te loupe.
Wat ’t nuijaor geit bringe is veur ederein e groet vraogteike. D’r zien lui die ziech dao groete zörg euver make en dao euver ligke te prakkezere. Meh dao sjöt me geine meter mèt op. ’t Kump wie ’t kump moot me mer dinke.
Es ’t good is loupe al hiel get lui roond in Mestreech die tijdens de koumende vastelaovend ’n belaankrieke rol goon speule. Ze mote evels hunne moond nog hawwe en niks verraoje. Dat is ’t ierste wat steit te gebäöre in eus stad.
Daan kump ’t vreugjaor. De ierste planne veur ’n korte vekansie weure al gemaak en soms geit me al op vekansie umtot ’t daan nog neet euveral drök is of te heit.
Ie me ’t good en wel in de gate heet is ’t nui jaor daan al e tiedsje op weeg en zien veer welliech 2025 e bitteke vergete en alles wat in dat jaor gebäörd is.
2025: Vaan de zomer höbbe veer de Heilegdomsvaart gevierd en heet Mestreech vaan twie prachtege, devote ommegange kinne genete. Heet de Vriethof weer ’n aontal weekende alle publiek veur André Rieu kinne herberge. Höbbe ’n aontal hermenieje en famfares e concert gegeve op de Vriethof. Heet de aw Maosbrögk, oonder de baoge, leech gekrege boedoor ze noe ouch saoves kint straole. Is me begonne mèt verkiersdrempels aon te lègke op de Greune Löper umtot hiel get lui toch de voot neet vaan ’t gaaspendaol aof kóste hawwe. Heet de gemeienteraod ziech geënseld euver ’t vertrek vaan de gemeintesikkertaris. Is pestoer Vries vaan de Slevrouwe Iere-Kannunnik gewoorde.
Wat iech wèl zègke is ’t gegeve tot hiel väöl dinger in Mestreech gebäörd zien. Mie lieske is neet compleet. Geer zalt nog väöl mie dinger wete op te somme. Meh veer goon weer e nuijaor tegemoot en Mestreech zal neet stèl stoon. Same kinne veer weer get sjoens devaan make. Op nao 2026 en hopelek kinne veer dat jaor beleve in rös en vrei.
Jan Janssen
