Inhoudsopgave
De lèsten tied is e nui fenomeen oontstaande um aander lui, boe me neet mèt door ’n deur kint, te verrasse mèt ’n vuurwèrkbom veur de väördeur te lègke. Leefs midde in nach zoetot de lui zelf en de lui in de naoventrint ziech neet allein de pokke sjrikke meh ouch nog ‘nen houp sjaoj höbbe. Wat sjut me dao eigelek mèt op? Pelisie weurt ingesjakeld en oetindelek weurt miestal toch iemes gevoonde dee zoeget geflik heet.
Ederein geit ziech noe ’n deurbel aonsjaffe boe ‘ne camera inzit zoetot me alles, via d’n tèllevisie, in de gate kint hawwe. Me vertrouwt dus geine mins mie. ’t Is toch ‘ne rare wereld gewoorde! Vreuger, en iech huur ’t Jan Terlouw nog zègke, had eder hoes e tuiwke oet de brevebös haange. De kinder kóste daodoor in en oet loupe en ouch de femilie en de naobers kóste binne zoonder aon de bel te trekke. In de gaank woort daan “joehoe” gerope en aon de stum hoort me wee binne waor.
Es me ‘nen achterum had woort dee gebruuk. Mien tant Lies voont ’t raar es iemes aon de väördeur belde. Daan mós ze alleriers de sleutel goon zeuke en rope tot ze thoes waors me tot ’t eve doorde. Es ze daan oetindelek de deur ope had gedoon waors ze dèks gans verpópzak vaan ’t feit tot die lui neet indirek achterum waore gekoume en zag ze tot de lui in ’t vervolg zeker en vas achterum móste koume. E sjoender welkomswoord en e stök vertrouwe in de mins kós me toch eigelek neet kriege.
Deen tied ligk noe e stök achter us. Op facebook stoon hiel get fèllemkes vaan nep-agente die awwer lui, via allerhande ineingeloge präötsjes, vaan hun cent en zjuwiele perbere aof te helpe. ’t Tuiwke wèrk dus neet mie, geine is mie te vertrouwe. De awwer lui zien neet mie veileg, zelfs neet es ze in e bejaordehoes woene want zelfs dao perbeert krapuul de lui te bestele.
’t Is ’n sport gewoorde um de lui ’t vel aof te doen, wie veer dat in Mestreech zègke. Op internet kint me persijs vinde wie me ’n vuurwèrkbom kint make of boe me die kint koupe. ‘ne Gek dee die bom snachs urges wèlt goon neergoeje is sjijns vlot gevoonde en daan heet me ’t idee tot d’n aandere ‘ns good gewaarsjouwd is gewoorde. Same weure veer dao evels neet beter vaan.
Iech hoop tot d’n tied vaan ’t tuiwke oets nog ‘ns maag trökkoume en tot veer mèt wäörd zake perbere op te losse en neet mèt vuurwèrkbomme en aander versjrikkeleke middele. Es ’t leves kint kóste is ’t altied verkierd. Praote en same koffiedrinke is tien kier beter.
Jan Janssen
