Inhoudsopgave
Veer, mien vrouw en iech, waore eve nog op vekansie gegaange. Wie ’t leedsje vaan Beppie: Veer zien mèt dee bös nao Oostenriek gewees. Um persijs te zien nao Tirol. Dao waore veer nog noets gewees. Veer hadde us e pläötske oetgekoze dat vlak bij de Zwitserse en d’n Italiaonse grens laog zoetot veer in drei len oetstepkes kóste make.
Veer höbbe in die 10 daog hiel väöl gezeen. Sjoen, leuke en interessante dinger gezeen. Veer zien tot 3000 meter huugte gewees en höbbe in 10 daog 227 haorspeltbochte beleef. Euze sjeffäör waors ‘ne kunsteneer dao in en daan heet me ouch gaaroet geinen angs, zoewel berg op es berg aof. Euze sjeffäör Twan verdeent e pluimke of beter gezag ’n ganse bössel pluimkes.
Veer waore mèt 48 lui in de bös. Veer waore de einzigste Limburgers, de rès waors vaan bove de groete riviere. Wat daobij ’t mieste opvèlt is es die lui aon diech vraoge boe’ste vaandan kumps. Zoe gaw este zègks tot’ste “oet Mestreech” kumps daan gebäört get mèt de lui. Ederein weurt lyrisch bij ’t hure vaan de naom Mestreech. De mieste lui vertèlle daan tot ze ein of mierdere kiere in Mestreech zien gewees. André Rieu is dèks de reie meh ouch ’t Preuvenemint is bekind bij de lui.
Veer waore lyrisch euver Oostenriek, Italië en Zwitserland en zij euver Mestreech. De mieste vinde Mestreech e perelke en beloere de lui die dao woene ouch mèt aander ouge. ’t Verandert tösse hun en diech meh iech kin neet zègke wie, meh dao gebäört get. Ze beginne netuurlek ouch euver euze carnaval. Ze snappe dao wieneg vaan en zeker este hun get vertèls euver de tradities en ’t steekspeul tösse polletiek en ’t volk vaan Mestreech, de machseuverdrach. Iech perbeer ummertouw te vertèlle tot euze vastelaovend get mie is allein mer beerdrinke en aongesjote zien.
Trök nao Oostenriek. Veer höbbe netuurlek ouch e ritsje in ’n kabelbaon gemaak. Aon e dräödsje in e gondelke op nao 2200 meter is toch wel hiel bezunder. Wie veer in de gondelke zaote mós iech dinke aon ’t plan um in Mestreech ouch ’n kabelbaon aon te lègke. Die zouw urges aon de kant vaan Heugem starte en daan de Maos euver goon en urges op Sint Pietersberg of d’n Observant indege. Dat zouw toch ech ’n toeristische attractie zien gewees. ’t Plan zal wel urges in ’n laoj ligke meh ’t zouw bezunder zien es dat plan oets oetgeveurd zouw kinne weure.
Veer zien weer trök en dat gief e good geveul. Zeker nao al die verhaole vaan die lui oet de bös die al ‘ns in Mestreech zien gewees. Veer zien daan weer gans gruuts op eus stad. Op vekansie waors ’t sjoen meh hei is ’t bezunder. Jeh, de bis sjovinis of neet!!
Jan Janssen
