Inhoudsopgave
’t Nui jaor is begonne en dat is gemeinelek veur hiel get lui ’t memint um gooj veurnummes te make. Dao daon iech miestal gaaroet aon mèt. Oets bin iech gestop mèt rouke en dat vin iech nog ummer ’t bèste wat iech oets gedoon höb. Mien wijnsje is get wat iech miech gun nao ‘nen daag bezeg te zien gewees en dat blijf e good veurnumme.
Wat iech wel eder jaor daon is eve de jaor-horoscoop leze en perbere te oontciefere. Gein jaor lök dat meh iech perbeer toch eder jaor deen horoscoop te leze. Perbere te oontdekke wat ’t nui jaor meugelek zou goon beteikene veur eine vaan us. Miestal is dat evels e verhaol boe’ste gein touw aon vas kins knuipe. Iech vin ’t knap wie iemes ganse zinne op pepier kint zètte die zoe oondudelek zien en geine mieter veurstèlle.
In miene horoscoop (iech bin scorpioen) steit beveurbeeld: de neiging om subtiele steken uit te delen is afgenomen. Iech bin veur de spiegel goon stoon en höb miech ‘ns aongeloerd en miech werkelek aofgevraog of iech dat oets gedoon höb in mien leve. Jao, wie iech sirremoniemeister waor en ‘die vaan us’ op ’t stadhoes vertèlde wat ze allemaol verkierd gedoon hadde, meh waors dat “subtiel”? Dus dees opmerking in d’n horoscoop verklaor iech dus tot groete quats.
Oonder ’t köpke ‘geld’ steit de zin: Dit jaar blijkt dat je niet overal bovenop hoeft te zitten om vooruitgang te boeken. Een financiële beslissing die eerst spannend voelde, pakt gunstig uit. Dat belaof dus get bezunders te weure. ’t Is noe mer te hope tot de lui vaan de Postcodeloterij, de Vriendenloterij en de Staatsloterij dee regel in mienen horoscoop ouch geleze höbbe en dao op gepaste wijze mèt um wete te goon. Es geer, dee dit lees, ouch scorpioen zeet daan steit us dus hiel get te wachte in ’t koumend jaor. Alvas perfisia en daot veural get goods mèt de duite die koume!
Bij “Gezondheid” steit in mienen horoscoop tot “Stilte werkt als medicijn, zoals een lange douche in het donker of een reeks squats terwijl je de ademhaling telt”. Op de ierste plaots wis iech gaaroet neet wat ‘squats’ beteikent. Dus opzeuke! Bliek dat de beweging te zien esof ste geis zitte, dus um de heupe en de bovebein te laote bewege. Daan dus mer douche in d’n duuster!
Iech vraog miech werkelek aof wie iemes dit allemaol verzonne krijg en of d’r überhaupt iemes is dee die verhaole veur woer aonnump en daonao geit leve.
Iech zègk mer zoe: veer zien wel wat ’t jaor geit bringe. Mèt die gekke wereldleiers vaan allewijl wètste gaaroet neet wat us te wachte steit, zelfs geinen horoscoop is dao tegen opgewasse.
Jan Janssen
