Lang leve de gaasrekening

Wat e weer! Haos neet te geluive tot veer zoe lang zoe good weer höbbe. De zomerkleier weure nog ummer gedragen en me heet nog geine zin um de winterkleier oet de motteballe te hole. Wat jaomer tot allein dee zoondag, 13 september, wie Mestreech had mote sjittere tot ‘t dee godganseleken daag geregend heet. Daonao höbbe veer inkel de zon gezeen.

Op de radio heet me ’t euver de wermste zomer sins ’t bijhawwe vaan ’t weer en de dao aon gekoppelde temperature. Is dit daan noe de opwerming vaan d’n eerdbol of is dit gewoen get aanders, einmaoleg?

Jeh, ’t is toch ’t gesprek vaan d’n daag dus höb iech de vraog mer ‘ns veurgelag aon chatgpt. ‘Chatteke’ zag tot de temperatuur vaan dinsdag en goonsdag inderdaod oetzunderleke waor meh tot me dat neet es opwerming kint zien. Gewoen doordat vaan oet ’t zuie werm loch weurt aongeveurd, daodoor höbbe veer good weer. Dus de werm loch oet zuid Europa kump euze kant oet en daodoor kinne de korte breuk en de rökskes nog aongedoon weure. Niks aanders dus.

De opwerming is ’n aander zaak. Daoveur mooste nao de temperatuur vaan hiel get jaore loere en neet allein vaan ei jaor. De gemiddelde temperatuur is de lèste jaore gewoen de loch in gegaange. ’t Is gewoen euver ’t algemein wermer gewoorde. De oetzunderleke temperatuur vaan de lèste daog heet dao mer e bitteke mèt te make en ’t koumend jaor kint dat weer gewoen aanders zien. Niks is of weurt gegarandeerd! ’t Kint dus gewoen ‘ne nate zomer weure koumend jaor mèt ‘nen hielen houp kuimende lui die zeivere euver ’t weer.

Wat e veurdeil is vaan dit bezunder good weer is de rekening vaan ’t gaas. Veer höbbe tot noe touw nog neet hove te stoke en dat lievert e sjoen veurdeil op want de gaasrekening is en blijf ‘ne blok aon eders bein. Pas geleie kaom ‘ne monteur ‘ne nuie gaasmeter ophaange. E gans smal dingske. Iech rappeleer miech nog d’n awwe gaasmeter thoes dee me mèt gaasknepkes mós vore. Die gaasknepkes koch mie ma aon ’t lokètsje vaan Cinema Palace in Wyck. Door die dinger in dee meter de duie kós me weer gaas gebruke um op te koke. Later kaom dao ’ne geiser bij umtot ’t gemaak in de hoeshawwes veuroet ging en me indirek werm en kaajd water nudeg had. Nao ’t gebruuk vaan kole kaom de gaashaard kieke dee indirek wermte gaof en neet iers opgestook mós weure. ’t Gemaak ging weer d’rop veurroet, de gaasrekening ouch!

Hopelek zal de gaasrekening dit jaor aon de liege kant blieve en kint ederein z’n cent aon get aanders spendere, get plezerigers wat neet de sjouw oetvluig.