Nou en??

Goonsdagaovend woort ’t programma vaan Eva Jinek oonderbroke um op de buis ’n giftege Dylan te zien versjijne. De gif waors vaan häör geziech aof te leze. Wat zal achter de geslote gordijne vaan ’t ministerie vaan Defensie allemaol besproke zien en wee heet dao mèt de voes op taofel geslage en de boel veur rot gesjeld? Dat koume veer netuurlek noets te wete meh tot ’t dao gestörmp heet, dat is zeker. Dat leed häör geziech dóbbel en dwars zien.

Daan zit eine vaan us ziech e verhaol aon te hure boe’ste niks mèt kins. ‘Tenminste iech neet! Iech, en iech dink de mieste vaan uuch, veer höbbe geinen houp duite op de baank stoon boe veer astrein belasting euver mote goon betaole. Dat op de ierste plaots. Wat wel interessant is, is de vermindering vaan de inkomstebelasting (€8,= per maond) die welliech veur us bedoeld is. Dat weurt de verrassing vaan ’t jaor. 

De lèste daog ging ’t op d’n tèllevisie euver niks aanders es ’t nui belastingstèlsel. Ederein dee bij e praot-programma aon taofel zaot leet zien leech d’reuver sjijne. Zoeväöl lui, zoeväöl meininge. De vraog waors daan ouch of de drei partije oet de probleme zouwe koume. Sjijns is dat veur goonsdag neet gelök en zien twie partije mèt de oppositie um taofel gegaange en höbbe ’n oplossing gevoonde. Wat noe?

Me vreug ziech werkelek aof in wat veur ’nen tied veer beland zien. Mèt ein praote is sjijns neet mie in de mode of weurt verkierd oetgelag. Dus zitte veer astrein in ‘ne crisis en zal de VVD oet de coalitie stappe, dink iech. Wat dat beteikent kin iech uuch neet veurspelle.

Dinsdagaovend had me ’t euver de Haagse polletiek en tot veer in vief jaor tied drei verkezinge höbbe gehad, naomelek op 17 miert 2021, 22 november 2023 en 29 oktober 2025. ’t Gevolg daovaan is tot ummertouw väöl nui lui in de twiede kamer kaome te zitte die oonervare waore en ie ze waore ingewèrk weer mochte vertrèkke. De polletiek löp dus volledeg sjeif en dat is noe dus weer ’t geval. Wee wèt nog wie ’t moot en wat veer, de lui in ’t land, nudeg höbbe. Zoe vlak veur ’t ind vaan ’t jaor zitte veer weer, um ’t mèt e sjiek woord te zègke, in ’n impasse. Verdomme, verdomme, verdomme!

Astrein mote veer opnui de belastingbreef invölle, volges de aw regeling of de nui, en aofwachte wat de belastingdeens daomèt deit, es ze ’t zelf al wete. De blauw envelop vèlt daan get later in de bös en dat kint mètvalle en tegevalle.

’t Is dus belaankriek wat oet de bös kump euver ’t belastingplan. Iech wins uuch, miechzelf en euze portmenee hiel väöl sterkte de koumende daog.