Inhoudsopgave
Zoondag is ’t weer zoewied en steit iemes op de Merret dee zeet tot heer Mestreech maag veurgoon in de benkeleke meh plezerege daog vaan de vastelaovend. Al daog vaan te veure is door de nudege lui gespikkeleerd wee ’t dit jaor zal zien en of ze häöm kinne. Dat is eder jaor toch ’t ritueel dat bij de verkezing vaan de stadsprins huurt. ’t Zien ‘rs evels mer hoondert op ’n ganse iew.
‘t Begint veur dee persoen mèt e geheim tèllefeunsje of e bezeukske op de laten aovend vaan ein of mierdere persoene die mèt e smoesje de benkele vraog kaome stèlle of’s diech en dien vrouw genege zien de vastelaovend veur te goon. Zoe gaw es “jao” heet geklonke daan beginne weke vaan lege en bedrege. ’t Kòppel moot veurbereid weure op die taak want ’t is neet niks.
Zoe gaw es ’t maske aof geit koume de Tempeleers bij diech in hoes. Mèt alle egards weure de honneurs woer genome. De prins en zien prinses hove zelfs de väördeur neet mie ope te doen, dat doen de adjudante es ze in hoes zien. Dat is sjieker en gief e stök rös aon de prins en zien femilie mèt zoeväöl feziet in veer weke.
In de weke tot niemes get maag wete moot ’t ein en aander geregeld weure. Dao moot e kostuum koume, e sjoen passend rokkostuum. Nui sjeun mote gepas weure en leefs ingeloupe weure. D’r moot ’n roed-geel-greun sjerp gemaak weure, ’t teike vaan zien prinssjap. De nuie prins zal ouch ’n prinsemöts op ziene kop mote kriege. Dat moot allemaol gemaak en gepas weure zoonder tot ’t prinselek snoetswèrk ziechbaar is en bekind weurt veurtot heer de Merret bereik heet. Dat huurt allemaol bij ’t geheimste speul vaan Mestreech. ’n Weerdevol traditie!
De nuie prins heet dus hiel deks ’n kap euver ziene kop in die weke veur ’t oetrope en maag ouch zien stum neet laote hure. ’t Is dus hiel dèks ‘jao’ en ‘nein’ knikke.
De spanning steig nao gelang ’t oetrope korterbij kump. Zelfs de Tempeleers wete neet wee oonder ’t maske zit. Allein ’t dreimaansjap dat de prinsekäös heet verzörg wèt wee ’t is. Ouch de Tempeleers zien op de Merret pas wee hun de koumende veer weke veur geit en op zaoterdag veur vastelaovend de Mach geit hole op ’t stadhoes.
Zoondagmiddag, tösse drei oor en haaf veer, kump Mestreech te wete wee ’t is. Dus veer zien us op de Merret! Tot daan daan.
En oondertösse kint geer ’t nui leedsje “Vastelaovendsnuutskes” alvas instudere um dat zoondag good mèt te kinne zinge.
Jan Janssen
